Монгол Улсын Ерөнхийлөгч У.Хүрэлсүхийн өргөн мэдүүлсэн УИХ-ын гишүүнийг эгүүлэн татах тухай хуулийн төслийг УИХ хэлэлцэх эсэхийг энэ долоо хоногт шийднэ. УИХ-ын Төрийн байгуулалтын байнгын хороо уг төслийг хэлэлцэхийг дэмжсэн. Харин нэгдсэн чуулганы хуралдаанаар санал хураалгахаас өмнө УИХ-ын дахь АН-ын бүлэг нэг хоногийн завсарлага авсан. Нөгөөдөр буюу пүрэв гарагийн чуулганы нэгдсэн хуралдаанаар хэлэлцэх эсэхээр санал хурааж шийднэ. Одоогоор гишүүд уг хуулийн төслийг хэлэлцэх эсэх асуудалд хоёр хуваагдаж, дийлэнх нь Ерөнхийлөгчийн санаачилсан энэ төсөл эргээд парламентын дархлаанд сөргөөр нөлөөлөх, эрх мэдлийн зөрчилдөөнд хүргэнэ гэсэн байр суурийг илэрхийлж буй. Хэн ямар байр суурь илэрхийлснийг тоймолж байна.

УИХ дахь АН-ын бүлгийн дэд дарга Х.Тэмүүжин: Ерөнхийлөгчөөс өргөн барьсан хуулийн төслийн тухайд хоёр өөр байр суурь нэлээд хүчтэй яригдаж байна. Нэг талаас нь харвал парламентыг илүү хариуцлагатай болгох ач холбогдолтой гэж үзэж байгаа бол нөгөө талаас парламентын дархлаа болон ардчиллыг эмзэг байдалд оруулж болзошгүй гэсэн шүүмжлэл гарч байгаа. Тиймээс гишүүдийн ирцийг бүрэн хангаж, хүн бүр саналаа өгөх боломжийг бүрдүүлэхийн тулд энэ асуудлаар АН-ын бүлэг нэг хоногийн завсарлага авсан.

УИХ-ын гишүүн Д.Батлут: Монгол Улсын Ерөнхийлөгчийн санаачилсан энэ хуулийн төслийг дэмжиж байгаа. Монголчууд угаасаа төр минь түвшин, түмэн олон амгалан байг гэж залбирдаг ард түмэн. Тиймээс төрд сайн хүмүүс ажиллаж, төрийн үйл ажиллагаа зөв шударга байх ёстой гэж иргэд хүсдэг. Төрд ажиллаж байгаа хүмүүс буруу харилцаа, хандлага гаргахгүй байх, хулгай зэлгий, авлигын хэрэгт холбогдохгүй байх ёстой. Энэ хуулийн төсөл батлагдсанаар ийм төрлийн зөрчил, асуудлаас урьдчилан сэргийлэх боломж бүрдэнэ гэж харж байна. Нэг талаас гишүүдэд хариуцлага сануулсан, нөгөө талаас гишүүдийг өөрсдийг нь хамгаалсан хууль болно гэж бодож байгаа. Зарим хүн энэ хуулийг парламентын дархлааг сулруулах гэж байна гэж тайлбарлаж байгаа. Миний хувьд тэгж харахгүй байна. Харин ч парламентыг илүү дархлаатай, илүү хариуцлагатай болгох боломжийг бүрдүүлж өгч байна гэж ойлгож байна.