УИХ-ын гишүүн Л.Оюун-Эрдэнийн хүргүүлсэн баримт мэдээлэлд холбогдох хэрэг болон ЗТЯ-ны Төрийн нарийн бичгийн дарга Б.Насантогтохын үл хөдлөх хөрөнгийг битүүмжилсэн асуудлаар АТГ-аас мэдээлэл өглөө.
АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгт: УИХ-ын гишүүн Л.Оюун-Эрдэнэд 2026 оны гуравдугаар сарын 23-ны өдөр гомдол, мэдээлэл ирүүлсэн. Үүнийг Авлигатай тэмцэх газар хүлээн авч, гуравдугаар сарын 31-ний өдөр хэрэг бүртгэл нээн шалгаж эхэлсэн. Тухайн гомдолд үндэслэн Монгол Улсын Эрүүгийн хуулийн тусгай ангийн 22.4.3-т заасан, улс төрд нөлөө бүхий этгээд хахууль авсан байж болзошгүй гэх зүйл ангиар хэрэг нээсэн. Өөрөөр хэлбэл, албан тушаалын чиг үүргээ хэрэгжүүлэхдээ бусдаас их хэмжээний авлига, хахууль авсан байж болзошгүй нөхцөл байдалд шалгагдаж байна гэсэн үг.
Л.Оюун-Эрдэнээс 4 цагийн мэдүүлэг авсан
Энэ хэрэгтэй холбогдуулан Л.Оюун-Эрдэнэ гомдол гаргасан бөгөөд гэрчийн мэдүүлэг авсан. Уг ажиллагаа дөрвөн цаг гаруй үргэлжилсэн юм. Одоогийн байдлаар нийт зургаан хүнээс мэдүүлэг авч, гурван баримтад үзлэг хийсэн. Мөн аж ахуйн нэгж, байгууллагуудаас таван удаагийн лавлагаа мэдээлэл авч, цаашид Монгол Улсад үйл ажиллагаа явуулдаг долоон арилжааны банкаас мэдээлэл авахаар ажиллаж байна.
А.Амундратай холбогдож, дуудан ирүүлэх бичгийг цахимаар хүргүүлсэн
Мөн Л.Оюун-Эрдэнэ гишүүний гаргасан гомдлын дагуу А.Амундра гэх хүнтэй холбогдож, мөрдөгчийн дуудан ирүүлэх хуудсыг цахимаар хүргүүлсэн. Тэрээр өөрийгөө гэрч, хохирогчийн хамгаалалтад авах мөн хамтран ажиллагч этгээдээр тогтоолгох хүсэлтэй байгаагаа илэрхийлсэн. Энэ асуудлыг одоогоор судалж байгаа. Хуулийн дагуу мөрдөгч тухайн хүнийг хохирогчоор тооцуулах, хамгаалалтад авах саналаа прокурорт хүргүүлж, улмаар шүүх эцэслэн шийдвэрлэдэг. А.Амундрад өөрийн оршин суугаа улсын Монгол Улсын Элчин сайдын яамаар дамжуулан хүсэлтээ ирүүлэх боломжтойг мэдэгдсэн. Мөн энэ хэрэгтэй холбогдуулан Нямжав, Уламбаяр зэрэг иргэдээс гэрчийн мэдүүлэг авч, холбогдох хүмүүсийг үргэлжлүүлэн шалгаж байна.
Б.Насантогтохын хэрэгт 3.7 тэрбум төгрөгийн үндэслэлгүй хөрөнгөжилт тогтоогдсон
Үүнээс гадна Зам, тээврийн яамны Төрийн нарийн бичгийн дарга Б.Насантогтохтой холбоотой хэрэгт мөрдөн шалгах ажиллагаа явагдаж байгаа. Түүнтэй холбоотой нийт 7.5 тэрбум төгрөгөөр үнэлэгдэх 17 үл хөдлөх хөрөнгө, гурван тээврийн хэрэгслийг битүүмжилсэн. Тэрээр Эрчим хүчний яаманд ажиллаж байхдаа нэр бүхий аж ахуйн нэгжүүдэд техникийн нөхцөл олгохдоо хууль, журмыг зөрчиж, давуу байдал олгосон байж болзошгүй байна. Үүний хариуд 281 сая төгрөгийн үнэлгээтэй орон сууц, 100 сая төгрөг, мөн 30 мянган ам.долларын хахууль авсан гэж үзэж байгаа.
Түүнчлэн түүний хөрөнгө орлого 3.4 тэрбум төгрөгөөр нэмэгдсэн нь дөрвөн үл хөдлөх хөрөнгө, хоёр тээврийн хэрэгсэл, 80 мянган ам.доллараар илэрч байгаа бөгөөд үүнийгээ хууль ёсных гэдгийг тайлбарлаж чадаагүй. Өөрөөр хэлбэл, үндэслэлгүй хөрөнгөжсөн гэж үзсэн юм. Одоогоор уг хэрэгт долоон хүн, нэг хуулийн этгээдийг яллагдагчаар татсан бөгөөд нийтдээ 3.7 тэрбум төгрөгийн үндэслэлгүй хөрөнгөжилт тогтоогдоод байна.
