БНХАУ-ын дарга Ши Жиньпин 2014 оноос хойш 12 жилийн дараа Монгол Улсад айлчилна гэсэн мэдээ өнгөрсөн долоо хоногт гарсан. Манай улсын хувьд БНХАУ болон ОХУ хоёрын дунд орших "стратегийн гүүр" улс учраас их гүрнүүдийн айлчлал онцгой ач холбогдолтой байдаг.

Хөрш орнуудын төрийн тэргүүнүүд тодорхой давтамжтайгаар Монголд айлчилж, харилцаагаа шинэ шатанд гаргах, бүс нутгийн бодлогоо баталгаажуулах хандлага ажиглагддаг. БНХАУ-ын даргын 10 орчим жилийн зайтай давтагддаг төрийн өндөр дээд хэмжээний айлчлал нь геополитикийн шинэ нөхцөл байдалтай уялдах элбэг.

Хятадын хувьд энэ давтамжийг тодорхой жишээгээр харж болно. 2003 онд тухайн үеийн БНХАУ-ын дарга Ху Жиньтао Монгол Улсад айлчилж, хоёр улсын харилцааг идэвхжүүлэх шинэ үеийг эхлүүлж байлаа. Үүнээс хойш 11 жилийн дараа буюу 2014 онд Ши Жиньпин Монгол Улсад төрийн айлчлал хийж, хоёр улсын харилцааг “иж бүрэн стратегийн түншлэл”-ийн түвшинд хүргэсэн. Ийнхүү 2026 онд дахин айлчлах гэж байгаа нь мөн 10 гаруй жилийн мөчлөг давтагдаж байгааг илтгэнэ.

Энэ давтамж нь санамсаргүй зүйл биш юм. Харин бүс нутгийн улс төр, эдийн засгийн нөхцөл байдал өөрчлөгдөх бүрд Хятад улс Монголтой харилцах бодлогоо шинэ шатанд гаргах шаардлагатай болдог. 2003 онд Хятад эдийн засгийн өсөлтөө тэлж байсан үе бол 2014 онд “Бүс ба зам” санаачилга эхэлж, Монголыг энэ хүрээнд татан оролцуулах стратеги боловсруулсан үе байв. Харин 2026 оны айлчлал нь цар тахлын дараах шинэ эдийн засгийн орчин, геополитикийн өрсөлдөөн ширүүссэн нөхцөлд хийгдэх гэж байгаагаараа онцлог юм.