Төсвийн орлого 2025 оны сүүлийн улирал, 2026 оны эхээр буурч, санхүүжилт тасалдах хүндрэл үүссэн ч Засгийн газрын шуурхай арга хэмжээ, хатуу хэмнэлтийн бодлогын үр дүнд нөхцөл байдал тогтворжсон байна. Цаашид эрчим хүчний салбарын хуримтлагдсан асуудлыг шийдвэрлэх зорилгоор төсвийн тодотгол хийх болон баялгийн сангийн эх үүсвэрийг ашиглах шаардлага үүссэн талаар Сангийн сайд Б.Жавхлан мэдээлэл өглөө.

Тэрээр "2025 оны дөрөвдүгээр улирал мөн 2026 оны нэгдүгээр улиралд төсвийн орлого буурч, зарим өдрүүдэд санхүүжилт тасалдах хүндрэлүүд гарч байсан. Харин Засгийн газраас шаардлагатай арга хэмжээг шуурхай авч хэрэгжүүлсний үр дүнд гуравдугаар сар гарснаар нөхцөл байдал мэдэгдэхүйц сайжирсан. Энэ хугацаанд бид хатуу хэмнэлтийн горимд шилжиж ажилласан. Тухайлбал, 2025 оны дөрөвдүгээр улиралд зарим зардлыг он дамжуулж, урсгал болон хөрөнгийн зардлуудаа эрэмбэлэн, нэн шаардлагатай ажлуудыг эхлээд санхүүжүүлэх бодлого баримталсан. Үүний үр дүнд одоогийн байдлаар санхүүжилт хэвийн үргэлжилж байна. Энэ хаврын чуулганаар төсөв, эдийн засагтай холбоотой олон чухал хуулийн төслүүдийг хэлэлцэх шаардлагатай байна. Сангийн яамнаас 2-3 жилийн турш боловсруулсан татварын багц хуулийг хэлэлцүүлэхээр бэлэн болгосон. Хэрэв энэ хуулийг хаврын чуулганаар баталж амжихгүй бол өөрчлөлтүүд 2027 оноос нааш эдийн засагт нөлөөлөх боломжгүй юм.

Эрчим хүчний салбарын хувьд тарифын асуудал олон жил хуримтлагдсан хүндрэл болоод байна. Тарифыг удаан хугацаанд барьж ирсний улмаас салбарын санхүүгийн байдал хүндэрч, доголдол үүсэх эрсдэл нэмэгдсэн. Энэ өвөл ч тодорхой зогсолт, гэмтлүүд гарч хүнд өвлийг бид тууллаа. Энэ асуудал нь эрчим хүчний сайдын асуудал биш, харин 20-30 жилийн турш хуримтлагдсан бүтэц, бодлогын алдаа юм. Иймд Засгийн газраас тодорхой хувилбарууд боловсруулж, төсвийн тодотгол хийх эсвэл одоогийн зардлын хүрээнд зохицуулалт хийх замаар шийдвэрлэх саналуудаа УИХ-д өргөн барихад бэлэн болоод байгаа. Бид жил бүр хүүхдийн мөнгөнд 1.6 их наяд төгрөг төсөвлөж, энэ дүн жил тутам 50-70 тэрбум төгрөгөөр өссөөр байна. Харин эрчим хүчний салбарт шаардлагатай санхүүжилтийг тооцоход ойролцоогоор 1.2 их наяд төгрөгийн нэг удаагийн зардлаар үндсэн асуудлыг шийдвэрлэх боломжтой гэсэн тооцоо гарсан. Үүнийг шийдсэнээр гурван жилийн хугацаанд үе шаттай шилжилт хийж зорьсон тарифтаа очих юм. Мөн Эдийн засгийн хөгжлийн яамны суурь тооцоогоор 591 тэрбум төгрөгийн татаас шаардлагатай байгаа. Үүнийг баялгийн сангийн эх үүсвэрээр шийдвэрлэх боломжийг судалж байна. Сүүлийн хоёр жилийн хугацаанд төсвийн зардлыг нэлээд танаж ирсэн. Цаашид дахин таналт хийх нь Засгийн газар болон яамдын хэвийн үйл ажиллагаанд сөргөөр нөлөөлөх эрсдэлтэй. Тиймээс бид баялгийн санг ашиглаж суурь асуудлуудаа шийдэхээс өөр арга байхгүй" гэлээ.