Төр бүхэлдээ гацаанд орчихлоо. Гэхдээ энэ бол улс төрд байдаг л үйл явц. Харин шийдвэр гаргадаг дарга нар хурдан маневрлаж, төрийг гацаанаас гаргах үүрэгтэй.

УИХ-ын олонхыг бүрдүүлж байгаа МАН-ын 64 гишүүн чуулгандаа ороход л төр гацаанаас гарна. Харамсалтай нь АН-ын бүлгийн 42 гишүүн дээр МАН-ын бүлгийн гомдогсод нийлээд чуулганы ирцийг бүрдүүлэхгүй хэмжээнд хүрчихлээ. Өчигдөр УИХ-ын дарга Н.Учрал чуулганы ирцийг бүрдүүл гэж цаг гаруй ганцаараа яриад үр дүнд хүрсэнгүй. Тиймээс энэ амралтын өдрүүдэд МАН-ын дарга нар уулзалтууд хийж, үүсээд байгаа нөхцөл байдлыг хэрхэн шийдэх, яаж гацаанаас гаргах асуудлыг ярих аж.

Зарим эх сурвалжийн мэдээлж буйгаар УИХ-ын дэд дарга нараар буюу Ж.Бат-Эрдэнэ, Б.Пүрэвдорж нараар чуулган удирдуулаад явж болох ч эсрэг ажиллаж магадгүй гэж үзээд энэ хувилбарыг сонгохгүй байгаа гэнэ. Гэхдээ хэдий болтол УИХ-ын дарга нь чуулганаа удирдаж чадахүй, дэд дарга нараар удирдуулаад суух вэ. Тэгэхээр дэд дарга нартаа итгээд чуулганаа удирдуулсан ч энэ удаан явахгүй хувилбар.

Ер нь энэ гацаанаас УИХ-ын дарга Н.Учрал, Ерөнхий сайд Г.Занданшатар нар л шийдвэр гаргаж гаргана гэдгийг хэлж байгаа юм. Ямартаа ч энэ амралтын өдрүүдэд уулзалтууд хийж, ганцаанаас гаргах хувилбаруудыг ярих нь. Ирэх 7 хоногийн пүрэв гаргаас өмнө МАН-ын дарга нар ямар нэгэн шийдвэрт хүрэхгүй бол парламентын үйл ажиллагаа олон хоног гацах эрсдэлд ороод байна.