Япон улс төрөлт буурч буй асуудлыг шийдэхийн тулд хүүхэд төрүүлэх бүх зардлыг улсын эрүүл мэндийн даатгалаар бүрэн хариуцах тогтолцоог нэвтрүүлэх шийдвэрийг баасан гарагт болсон Засгийн газрын хуралдаанаар баталлаа.

Одоогийн Японы системийн дагуу төрөлтийн нийт зардлыг улсын эрүүл мэндийн даатгал бүрэн хариуцдаггүй. Кесар хагалгаа зэрэг онцгой төрөлтийн тохиолдолд эмнэлгийн яаралтай тусламж гэж үзэн даатгалаар хэсэгчлэн төлдөг бөгөөд тухайн хүн эмчилгээний зардлын 30 хувийг өөрөө төлөх шаардлагатай байдаг.

Харин ердийн төрөлтийн үед улсын эрүүл мэндийн даатгалд хамрагдсан эмэгтэйчүүдэд нэг хүүхэд төрүүлэхэд 500,000 иений (ойролцоогоор 3,130 ам.доллар) нэг удаагийн тэтгэмж олгодог. Гэвч сүүлийн жилүүдэд төрөлтийн зардал нэмэгдэж байгаа тул энэ нэг удаагийн мөнгө ихэнх тохиолдолд бүх төлбөрийг бүрэн нөхөж чаддаггүй байна.

Эрүүл мэндийн яамны хамгийн сүүлийн мэдээллээр, улсын хэмжээнд (төрийн болон хувийн эмнэлэг, клиник, төрөх газруудыг хамруулан) хүүхэд төрүүлэх дундаж зардал 2024 оны санхүүгийн жилд 520,000 иен болсон нь 10 жилийн өмнөх 430,000 иенээс мэдэгдэхүйц өссөн үзүүлэлт юм.

Мөн энэ зардал мужуудаас хамаарч ихээхэн ялгаатай байдаг аж. Токио хотод хүүхэд төрүүлэх зардал хамгийн өндөр бөгөөд 2024 оны санхүүгийн жилд дунджаар 648,000 иен байсан бол хамгийн бага нь Кумамото мужид 404,000 иен орчим байжээ.

Шинэ өөрчлөлтийн хүрээнд Засгийн газар улс даяар төрөлтийн нэгдсэн тариф тогтоож, үүнийг улсын эрүүл мэндийн даатгалаар бүрэн төлөх юм. Ингэснээр хүүхэдтэй болох санхүүгийн дарамтыг бууруулж, улс орны төрөлтийн бууралтыг сааруулах зорилготой байна.

Засгийн газрыг баталсны дараа холбогдох хуулийн төслүүдийг энэ жил парламент хэлэлцэх бөгөөд шинэ тогтолцоог 2028 оны санхүүгийн жилээс хэрэгжүүлж эхлэх төлөвтэй байгаа тухай хэвлэлүүд мэдээлжээ. Гэвч одоогоор эмнэлгүүд өөрсдөө тогтоодог төрөлтийн төлбөрийг гэнэт нэг стандарт болговол зарим эмнэлгийн үйл ажиллагаанд нөлөөлж болзошгүй гэж үзэж байна. Иймээс засгийн газар шинэ системийг заавал хэрэгжүүлэх хатуу хугацаа тогтоохгүй, мөн одоохондоо 500,000 иений нэг удаагийн тэтгэмжийг үргэлжлүүлэн олгох аж.