Шатахууны хангамж, үнийг тогтворжуулах ажлын хэсгийн хурлаар энэ онд 480 мянган тонн шатахуун хадгалах сав барих зорилт тавьж, банкууд ойролцоогоор 500 тэрбум төгрөгийн санхүүжилт гаргах боломжтой гэдгээ илэрхийлжээ. Мөн АИ-92 бензиний үнийг 2026 оны арванхоёрдугаар сарын 31-нийг хүртэл тогтворжуулсан бөгөөд ойрын гурван сард үнэ өөрчлөгдөхгүй талаар АҮЭБ-ийн дэд сайд Б.Энхтүвшин мэдээлэл өглөө.
Тэрээр "Шатахууны хангамж, үнийг тогтворжуулах чиг үүрэг бүхий зөвлөл Засгийн газрын шийдвэрээр ажилладаг. Энэхүү зөвлөлийн дэргэд байгуулагдсан ажлын хэсгийг миний бие ахлахаар болсон. Энэ хүрээнд өчигдөр зөвлөлийн хуралдааныг хийлээ. Хурлаар дэлхий нийтэд үүсээд байгаа нөхцөл байдал, шатахууны хангамжийн өнөөгийн байдал, цаашид Монгол Улс ямар бодлого баримтлах талаар хэлэлцсэн юм. Мөн стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн хэрэгжилтийг хангах асуудлыг ярилцсан. Энэ хүрээнд энэ онд нийт 480 мянган тонн шатахуун, нефтийн бүтээгдэхүүн хадгалах сав барих зорилт тавиад байна.
Үүнтэй холбоотойгоор Монгол Улсад үйл ажиллагаа явуулдаг 17 банк болон Монголбанктай хамтарсан уулзалт хийсэн. Банкууд өөрсдийн эх үүсвэрээр ойролцоогоор 500 тэрбум төгрөгийн санхүүжилт гаргах боломжтой гэдгээ илэрхийлсэн. Харин салбарын яамнаас тухайн төсөлд оролцох аж ахуйн нэгжүүдэд тавигдах тодорхой шалгуур, шаардлагыг боловсруулж өгөхийг хүссэн. Манай яам банкуудтай зөвлөлдөн, аж ахуйн нэгжүүдээс санал авч тодорхой зөвлөмж гарган Монголбанкинд хүргүүлэхээр ажиллаж байна. Одоогийн байдлаар 20 орчим аж ахуйн нэгж шатахууны агуулахын сав барих хүсэлтээ ирүүлээд байна. Цаашид энэ тоо тийм ч их нэмэгдэхгүй болов уу гэж харж байгаа. Бид дөрөвдүгээр сарын 1-ний дотор банкуудад шаардлагатай мэдээллээ өгөхөөр төлөвлөж байна.
Нөгөө талаас дэлхийн зах зээл дээр тодорхой эрсдэлүүд үүсээд байна. Америк, Ираны хоорондын хурцадмал байдлаас шалтгаалан дэлхийн нефтийн бүтээгдэхүүний 20 орчим хувь дамжин өнгөрдөг Ормузын хоолойд тодорхой асуудал үүссэн. Үүнтэй холбоотойгоор брэнд маркийн газрын тосны үнэ ойролцоогоор 30 хувь өсөөд байна. Энэ нь цаашдаа манай улсад ч нөлөөлөх эрсдэлтэй. Мөн энэ онд БНХАУ-аас нефтийн бүтээгдэхүүн импортлох боломжгүй болсон. Хятад улс гадагшаа нефтийн бүтээгдэхүүн гаргахыг хориглосон тул Монгол Улс шатахуунаа 100 хувь ОХУ-аас авах нөхцөл байдал үүсээд байна.
Харин АИ-92 бензиний үнийг бид тогтворжуулсан. Энэ бензиний нийлүүлэлтийн гэрээ 2026 оны арванхоёрдугаар сарын 31 хүртэл хүчинтэй. Нэг тонн нь ойролцоогоор 705 ам.долларын үнэтэй байгаа. Гэхдээ энэ үнэ дэлхийн зах зээл дээр 30 хувь дээш, доош хэлбэлзвэл аль нэг талын санаачилгаар гэрээний үнэд өөрчлөлт оруулна гэсэн заалттай юм. Тиймээс ойрын гурван сарын хугацаанд АИ-92 бензиний үнэ өөрчлөгдөхгүй гэж ойлгож болно. Харин үнэ чөлөөлсөн евро-5 стандартын түлш, дизель түлш, АИ-95 бензин дээр тодорхой хэмжээнд үнийн хэлбэлзэл гарахыг үгүйсгэхгүй. Шатахууны үнэ тогтвортой байх, эсэх нь зөвхөн биднээс шалтгаалахгүй, дэлхийн зах зээл дээрх нөхцөл байдлаас хамаарна" гэлээ.
Одоогийн байдлаар шатахууны нөөц:
Шингэрүүлсэн шатах хий – 34 хоногийн нөөцтэй байна.
