Ерөнхийлөгчийн ээлжит сонгууль болоход жил гаруйн хугацаа үлдээд байна. Сонгууль бүрийн өмнө сонгуулийн хуульдаа өөрчлөлт оруулдаг байдал жишиг болон тогтсон.

Тэгвэл энэ удаагийн Ерөнхийлөгчийн сонгуулийн өмнө Ерөнхийлөгчийн сонгуулийн тухай хуульд өөрчлөлт оруулах, эсэх хаврын чуулган эхлэхээр тодорхой болно. Харин Сонгуулийн ерөнхий хорооноос гурван асуудлаар Ерөнхийлөгчийн сонгуулийн тухай хуульд нэмэлт, өөрчлөлт оруулах санал боловсруулан УИХ-ын гишүүн Д.Бум-Очирт өгчээ. Ингэхдээ зөвхөн санал авах процесст өөрчлөлт оруулахаар тусгасан байна.

1. Саналыг урьдчилж авах
2. Харъяалал харгалзахгүй санал авах
3. Гадаад байгаа иргэд цахимаас гадна өөрийн биеэр санал өгөх гэсэн гурван өөрчлөлтийг СЕХ-оос санаачилжээ.

Ерөнхийлөгчийн сонгуулийн тухай хуульд өөрчлөлт хийхвэл энэ хаврын чуулганд багтаан батлах ёстой. Учир нь хуульд "Монгол Улсын Ерөнхийлөгчийн ээлжит сонгуулийн санал авах өдрөөс өмнөх нэг жилийн хугацаанд Монгол Улсын Ерөнхийлөгчийн сонгуулийн тухай хууль батлах, түүнд өөрчлөлт оруулахыг хориглоно" гэж заасан. Тиймээс ирэх зургадугаар сараас өмнө Ерөнхийлөгчийн сонгуулийн тухай хуульд өөрчлөлт оруулна гэсэн үг. Гэхдээ одоогоор эрх баригч МАН-аас Ерөнхийлөгчийн сонгуулийн тухай хуульд нэмэлт, өөрчлөлт оруулах санал гараагүй, ямар нэгэн байдлаар хуулийн өөрчлөлтийн талаар яригдаагүй байгаа аж.