Засгийн газрын ээлжит хуралдаан өндөрлөж, хуралдаанаар хэлэлцэн зарим асуудлын талаар холбогдох  сайд нар мэдээлэл хийлээ. Хэвлэлийн хуралд Сангийн сайд Б.Жавхлан Гэр бүл, хөдөлмөр нийгмийн хамгааллын сайд Т.Аубакир сайд, Эрчим хүчний дэд сайд С.Далхаасүрэн, Хууль зүйд дотоод хэргийн дэд сайд Д.Мөнх-Эрдэнэ нар оролцлоо.

Өнөөдрийн хуралдаанаар Төрийн нууцын тухай, Төрийн нууцын жагсаалт батлах тухай хуулийн төслүүдийг өргөн барихаар шийдвэрлэжээ. Тус хуулиар төрийн нууцад байгаа 202 мэдээллийг гаргах юм байна. Мөн төрийн нууцын жагсаалтыг Засгийн газар баталж байгааг УИХ-д шилжүүлэх юм байна.

Хууль зүйд дотоод хэргийн дэд сайд Д.Мөнх-Эрдэнэ “Албаны нууцын нэрийн дор шаардлагагүй мэдээллийг нууцаж болдог эрх зүйн зохицуулалтыг хуулиас хасна. Өнөөдрийн байдлаар ТЕГ-т бүртгэлтэй байгаа 894 албаны нууц байна. Энэ нууц ил болго гэсэн үг. Энэ бол авлига албан тушаалын гэмт хэрэгтэй тэмцэх, иргэдийн мэдэх эрхийг хангах чиглэлээр хийж байгаа хууль. Эдгээр хуулийг ирэх 7 хоногт УИХ-д өргөн мэдүүлнэ. Өнөөдөр төрийн нууцын жагсаалтыг Засгийн газар баталж байгаа. 574 мэдээлэл байгаа. Бидний өргөн барих хуулийн төслөөр цаашид 574 мэдээлэл биш 202 мэдээллийг төрийн нууцаас гаргана. Мөн УИХ-д төрийн нууцыг батлах эрхийг шилжүүлнэ” гэлээ.