Өвөл, хаврын хурдан морины уралдаанд 18 нас хүрээгүй хүүхдийг оролцуулахыг хориглосон Засгийн газрын тогтоолын хэрэгжилтийг орон нутагт хангуулж ажиллаагүй нэр бүхий зургаан аймгийн 11 сумын Засаг даргад хариуцлага тооцжээ. Сүүлийн 10 жилийн хугацаанд хурдан мориноос унаж 46 хүүхэд амь насаа алдсан харамсалтай тоо баримт бий. Иймд хурдан морины уралдаан, үсэргээ зэрэг арга хэмжээг илүү тодорхой зохицуулж, эрх зүйн орчныг боловсронгуй болгох шаардлагатай байгааг ХЭҮК-ын Гомдол, хяналт шалгалтын хэлтсийн дарга Б.Ууганбаатар мэдээллээ.

Тэрээр “Сар шинийн баяр ойртсонтой холбоотойгоор хоёрдугаар сараас эхлэн хөдөө орон нутагт хурдан морины үсэргээ, сунгаа, уралдаан зохион байгуулагдаж эхэлдэг. Засгийн газрын 2019 оны 57 дугаар тогтоолд 2025 оны нэгдүгээр сарын 29-ний өдөр өөрчлөлт оруулж жил бүрийн арваннэгдүгээр сарын 1-нээс тавдугаар сарын 1-ний өдрийг хүртэлх хугацаанд 18 нас хүрээгүй хүүхдийг хурдан морины уралдаанд оролцуулахыг хориглосон. Гэвч бодит байдал дээр уг шийдвэр бүрэн хэрэгжихгүй, зөрчигдөж байгаа нь ноцтой асуудал дагуулж байна. Үүний улмаас хүүхэд бэртэж гэмтэх, хөгжлийн бэрхшээлтэй болох, цаашлаад амь насаа алдах хүртэл харамсалтай үр дагавар гарсаар байна. Тухайлбал, сар шинийн баярын өмнөхөн Хөвсгөл аймгийн Галт суманд хурдан морины ажил хийж байсан унаач хүүхэд амь насаа алдсан хэрэг гарсан. Мөн Төв аймгийн Сэргэлэн суманд хурдан морины үсэргээний шинжтэй үйл ажиллагаа болсон талаар мэдээлэл бий. Бид энэ асуудалд хяналт тавин ажиллаж байна. Манай байгууллага хүүхдийн эрхийг хамгаалах чиг үүрэг хүлээсэн бүх шатны Засаг дарга болон холбогдох төрийн байгууллагын үйл ажиллагаанд хяналт тавих үндсэн үүрэгтэй.