НИТХ-ын ээлжит бус X хуралдаан өнөөдөр боллоо. Хуралдаанаар нийслэлийн 2026 оны төсөвт нэмэлт, өөрчлөлт оруулах тухай хэлэлцсэн юм. Энэ үеэр НИТХ-ын төлөөлөгч Б.Золтуяа “Нийслэл 4.3 их наядын төсвийг сар хагасын өмнө баталчихаад, одоо 6.5 их наяд болгож нэмэгдүүлэх гэж байна. Хэзээ үр ашиг гарах нь тодорхойгүй маш өндөр дүнтэй төслүүдийг оруулж ирж байна” гэсэн юм.

НИТХ-ын төлөөлөгч Б.Золтуяа: Нийслэл оны төгсгөлд 4.3 их наяд төгрөгийн төсөв батлуулсан. Гэтэл ердөө сар хагасын дараа 6.5 их наяд болгож нэмэгдүүлэхээр тодотгол оруулж ирж байна. Ийм богино хугацаанд ийм их зөрүүтэйгээр төсөв нэмэгдүүлж байгаа нь өөрөө анхаарал татаж байна. Тэр дундаа ард иргэдийн ажил, амьдралд шууд нөлөөлөх хэмжээний өндөр орлогын төсөөлөл оруулж ирсэн нь эрсдэл дагуулж мэдэхээр байгаа юм. Нэг удаагийн шинжтэй торгууль, хүүгийн орлого, татвар болон татварын бус орлогыг хэт өндөр тооцоолсон нь төсвийн тогтвортой байдлыг алдагдуулах магадлалтай.

Томоохон мега төслүүдийг ярьж байгаа ч бодит үр ашиг нь хэзээ гарах нь тодорхойгүй, урт хугацаанд хэрэгжих төслүүдэд өндөр дүн тавьж байна. Үүний нэг жишээ нь “УБ трамвай” төсөл. Өнгөрсөн жил Техник, эдийн засгийн үндэслэл боловсруулж байх үед нь төр, хувийн хэвшлийн түншлэлээр хэрэгжүүлнэ, 28 жилийн хугацаанд жил бүр 66 тэрбум төгрөгийг нийслэлээс гаргана гэж баталж байсан. Гэтэл өнөөдөр 2026 онд энэ төсөлд 350 тэрбум төгрөг төсөвлөж оруулж ирлээ. Энэ үнэхээр харамсалтай санагдаж байна. Би тухайн үед ч энэ төслийн талаар саналаа хэлж байсан. Яармагаас хотын төв хүртэл 2 их наяд төгрөгөөр трамвай барих нь үнэхээр өнөөдрийн нөхцөл байдалд хамгийн зөв шийдэл мөн үү гэж асууж байсан. Ийм том дүнтэй, урт хугацаанд үр ашгаа өгөх нь ч тодорхойгүй төсөл. Өнөөдөр 350 тэрбум төгрөгийг энэ төсөлд батлах гэж байгаа нь үнэхээр хайран юм.

Хүннү хот гэх мэт одоогоор цаасан дээр байгаа хотуудыг ярьж байна. Харин бодитоор хөгжүүлэх боломжтой Багануур, Налайх зэрэг дүүргүүддээ энэ 350 тэрбум төгрөгийг хуваарилбал бодит өөрчлөлт гарна. Бэлэн боломж, бодит хэрэгцээн дээрээ хөрөнгө оруулахын оронд хэрэгжих эсэх нь тодорхойгүй төслүүдийг урьтал болгож байгаа нь ойлгомжгүй байна. Өнөөдөр бид 350 тэрбум төгрөгөөр 15 сургууль шинээр барих боломжтой. Бодит амьдрал дээр сургууль, цэцэрлэгийн хүртээмж нэмэгдэхэд л хотын түгжрэл тодорхой хэмжээнд буурах юм. Бид анхан шатны хэрэгцээгээ бүрэн хангаж чадахгүй байж, олон жилийн дараа үр өгөөж нь мэдэгдэх том төслүүдэд асар их мөнгө зарцуулах гэж байна.