Улаанбурхан өвчний нөхцөл байдал улсын хэмжээнд анхаарал татсан хэвээр байна. Халдварт өвчин судлалын үндэсний төвөөс мэдээлснээр улаанбурхан өвчний батлагдсан нийт тохиолдол 14,257-д хүрчээ. Үүнээс нийслэлд 11,607 орон нутагт 2645 тохиолдол бүртгэгдсэн байна. Сүүлийн нэг хоногт дөрвөн шинэ тохиолдол нэмж батлагджээ.

Одоогийн байдлаар 27 хүн эмнэлэгт хэвтэн эмчлүүлж байгаагаас 16 нь нийслэлд, 12 нь хөдөө орон нутагт байна. Мөн 14 иргэн гэрийн хяналтад эмчлүүлж байгаа аж. Насны бүлгээр авч үзвэл 10–14 насны хүүхдүүдийн өвчлөл хамгийн өндөр буюу 5218 тохиолдол бүртгэгдсэн нь нийт өвчлөгсдийн дийлэнх хувийг эзэлж байна. Үүнээс гадна 0–4 насны 3440, 5–9 насны 1823, 15–19 насны 1772 хүүхэд улаанбурханаар өвчилжээ.

Улаанбурхан нь халдварлалт өндөртэй ч вакцинаар бүрэн сэргийлэх боломжтой халдварт өвчин юм. Иймд иргэд улаанбурхан өвчний эсрэг вакцинд хамрагдсан эсэх мэдээллээ өөрийн харьяа өрх, сумын эрүүл мэндийн төвд очиж, цахим бүртгэлийн системд нягтлуулахыг мэргэжлийн байгууллагаас зөвлөж байна. Хэрэв вакцинд хамрагдаагүй, эсвэл товлолт хугацаанаас хоцорсон бол нөхөн дархлаажуулалтад хамрагдаж, өөрийгөө болон бусдыг халдвараас хамгаалах шаардлагатай юм.