Ойрын өдрүүдэд ихэнх нутгаар цаг агаар эрс муудаж, цас орж, салхи шуурга ширүүсэхийг мэргэжлийн байгууллагаас онцгойлон анхаарууллаа. Ялангуяа энэ сарын 20-22-ны өдрүүдэд баруун, төв, говь болон зүүн аймгуудын нутгаар цасан болон шороон шуурга шуурч, хүчтэй салхитай байх төлөвтэй байна.

Урьдчилсан мэдээгээр 20-нд баруун болон төвийн аймгуудын ихэнх нутаг, говийн аймгуудын хойд хэсгээр цас орно. 21-нд баруун аймгуудын зүүн хэсэг, төв, говь, зүүн аймгуудын ихэнх нутгаар, 22-нд зүүн аймгуудын нутгаар цас орж, цасан шуурга шуурах юм. Салхины хувьд 20-нд ихэнх нутгаар, 21-нд говь, тал, хээрийн нутгаар секундэд 18-20 метр хүрч, зарим үед секундэд 24 метр хүртэл ширүүснэ. Харин 22, 23-нд нутгийн зарим газраар секундэд 16-18 метр хүрч, шороон шуурга шуурах төлөвтэй байна. Иймд ил задгай талбайд зорчих, хол замд гарах иргэд, малчид, тээврийн хэрэгсэл жолоодогчдыг онцгой анхаарал болгоомжтой байхыг зөвлөж байна.

Мөн хүйтний эрч эрс чангарч, шөнөдөө зарим бүс нутагт -40 градус давж хүйтрэхээр байна. Тухайлбал, Увс нуур орчим болон Дархадын хотгор, Завхан, Заг-Байдраг голын эх, Идэр, Тэс, Ерөө голын хөндийгөөр шөнөдөө -36…-41 градус, өдөртөө -26…-31 градус хүйтэн байна. Алтай, Хангай, Хөвсгөл, Хэнтийн уулархаг нутаг, Орхон, Сэлэнгэ, Хараа, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -29…-34 градус, өдөртөө -22…-27 градус хүйтрэх бол говийн бүс нутгийн өмнөд хэсгээр шөнөдөө -15…-20 градус, өдөртөө -8…-13 градус, Хангайн нурууны өвөр бэл болон говийн хойд хэсгээр шөнөдөө -20…-25 градус, өдөртөө -13…-18 градус хүйтэн байх төлөвтэй байна. Бусад нутгаар шөнөдөө -25…-30 градус, өдөртөө -18…-23 градус хүйтэн байна.

Цаг агаарын энэхүү огцом өөрчлөлт нь зам даваа хаагдах, халтиргаа гулгаа үүсэх, мал бэлчээрлэлт хүндрэх, осгож хөлдөх эрсдэл нэмэгдэх нөхцөл бүрдүүлж болзошгүй тул иргэдийг дулаан хувцаслах, хол замд гарахдаа цаг агаарын мэдээг тогтмол авах, тээврийн хэрэгслийн бүрэн бүтэн байдлыг хангах, малчдыг малаа ойр бэлчээрлүүлэх, нөөц тэжээлээ базаахыг холбогдох байгууллагаас анхаарууллаа.