Эрдэнэт хотод үйл ажиллагаа явуулдаг "Зэс эрдэнийн хувь" ХХК-ийн хувьцаа эзэмшигчид Барилга, хот байгуулалтын сайд Э.Бат-Амгалангийн дүү тус компанийн Санхүү эрхэлсэн захирлаар ажиллаж байсан Э.Батбаяр болон түүний найз н.Дэлгэржаргал нар 30 гаруй тэрбум төгрөг шамшигдуулсан асуудлыг шалгуулахаар АТГ-т хандлаа.

"Зэс эрдэнийн хувь" ХХК-ийн гүйцэтгэх захирал Б.Мөнхбаатар: "Зэс эрдэнийн хувь" ХХК 2010 онд байгуулагдсан. Миний  хувьд 2019 онд компанийн гүйцэтгэх захирлаар ирээд ковидын хэцүү үед ч үйлдвэрээ барьж босгож ажилласан. Манай компанийн Санхүү эрхэлсэн захирлаар ажиллаж байсан Э.Батбаяр 2019 онд төрийн албан хаагч байсан. Бид хамтдаа санхүү мөнгө босгоё, зээл олж ирье гэж хамтарч ажиллаж эхэлсэн. Тэрээр бидний итгэлийг олж авч, Төлөөлөн удирдах зөвлөлийг хууран мэхэлж, 2022 оны аравдугаар сард энэ бүх  үйл ажиллагааг эхлүүлсэн байдаг. Тодруулбал, манай компани 30.6 тэрбум төгрөгөө НӨАТ хэлбэрээр Э.Батбаярын компанид алдсан.

Гадаад руу экспорт хийж байгаа компани НӨАТ төлдөггүй. Э.Батбаяр анх ямар нэгэн НӨАТ-ын дарамт үүсэхгүй гэж хэлж гэрээ байгуулаад өөрийн компаниар дамжуулан худалдааг хийж байсан. Манай компани 2023 оноос эхлээд 10 гаруй мянган тонн зэс гаргахад үүнтэй холбоотойгоор 30.6 гаруй тэрбум төгрөгийг НӨАТ нэрээр идэж, ууж шамшигдуулсан гэж үзэж байна. Энэ мөнгийг сайд ахынхаа сонгуульд зарцуулсан байх магадлалтай. Энэ бүхнээс шалтгаалж манай компани хувьцаа эзэмгшигчиддээ ногдол ашиг тарааж чадахгүй болсон учраас хуулийн байгууллагад хандаж байна. Дархан, Эрдэнэт хотын 24 мянган хувьцаа эзэмшигч хохироод ногдол авч чадахгүй болсон тиймээс Хууль зүйн сайд Б.Энхбаярт ч хандана. Биднийг хүлээн авч уулзаж тулгарсан асуудлыг шийдэж өгнө гэж найдаж байна.

Э.Батбаяр гэрээ хийхдээ төрийн байгууллага болон Сангийн яаманд ажилладаг хүмүүстэй хамтарч Оюутолгойн гэрээтэй ижил санхүүгийн луйврын схем ашигласныг саяхан мэдсэн. Бид энэ гэрээг цуцлуулахаар Сүхбаатар дүүргийн шүүхэд хандсан байгаа. Энэ хүн хөрөнгө оруулагч нэрээр дагуулж ирсэн ах нарынхаа мөнгийг ч өгөөгүй байх магадлалтай байна. "Зэс эрдэнийн хувь" компанийн хувьцаа эзэмшигчид болох Орхон, Дархан-Уул аймгийн 24 мянган иргэн ногдол ашгаа авах хэрэгтэй байна. Дээрээс нь компани ашигтай ашиглаж, улсдаа татвараа төлж, Баялгийн сандаа татвараа төвлөрүүлэх ёстой. Бүтээн байгуулагч инженер биднийг санхүүгийн хүмүүс дээрэлхэж луйвардаад хуулийнхантай нийлж бидний ажлыг хийлгэхгүй байна.

Яг одоо бол манай үйлдвэр рүү цагдаагийнхан  хүчээр дайрч орж түрэмгийлж, үйлдвэр зогссон байхад дээрээс нь нэмж дарамталж байна. Иймээс компанийн болон хувьцаа эзэмшигчдийн төлөөлөл болсон хүмүүс Хууль зүйн сайд болон Авлигатай тэмцэх газарт хандаж байна.