Хууль зүй, дотоод хэргийн сайд Б.Энхбаяр Смарт эко транс компанитай холбоотой асуудлыг танилцуулж, тус компани Засгийн газрын тогтоолыг зөрчсөн гэдгийг мэдэгдэв. Анх тус компанид жолоочгүй тээврийн хэрэгслээр нүүрс тээвэрлэх үйл ажиллагаа явуулах зөвшөөрөл олгосон байна. Гэвч одоогийн байдлаар жолоочтой, жолоочгүй тээврийн хэрэгсэл хамаарахгүйгээр нүүрс тээвэрлэж байгаа нь тогтоогдсон бөгөөд энэ компани давуу эрх эдлэхэд хэд хэдэн эрх бүхий хүмүүс оролцсон талаар мэдээллээ.

Хууль зүй, дотоод хэргийн сайд Б.Энхбаяр: Засгийн газрын тогтоолын дагуу Смарт эко транс компани хууль зөрчсөн нь тогтоогдсон. Анх тус компанид жолоочгүй тээврийн хэрэгслээр нүүрс тээвэрлэх туршилтын, тодорхой зориулалттай зөвшөөрөл олгосон. Гэтэл өнөөдөр жолоочтой, жолоочгүй эсэхээс үл хамааран нүүрс тээвэрлэж байна. 2023 оноос хойш нийт 15.6 сая тонн нүүрс тээвэрлэсэн байна. Мөн 19.2 км авто замыг дур мэдэн ашиглаж, төрийн өмчийн замаар их хэмжээний ашиг олсон. Уг газар нь жолоочгүй нүүрс тээвэрлэх терминал гэсэн агуулгаар яригдаж байсан ч газар ашиглах эрх олгогдоогүй байхад үйл ажиллагаа явуулж байгаа нөхцөл байдал тогтоогдсон. Бусад асуудлыг өнөөдрийн Засгийн газрын тогтоолын дагуу хууль хяналтын байгууллагууд нарийвчлан шалгаж, хариуцлага тооцох юм.

2025 оны арванхоёрдугаар сард Ерөнхий сайд Гашуунсухайт хилийн боомт дээр Смарт эко транс компанид олгосон эрхийн асуудлыг шалгах үүргийг Хууль зүй, дотоод хэргийн сайдад өгсөн. Үүний дагуу 2026 оны нэгдүгээр сард ажлын хэсэг байгуулагдаж, шалгалтын дүнг өнөөдрийн Засгийн газрын хуралдаанд танилцууллаа. Шалгалтаар Смарт эко транс компанид яагаад давуу эрх олгосон бэ гэдгийг тодруулахад, 2022 онд гарсан Засгийн газрын 95 дугаар тогтоолтой холбоотой асуудал гарч ирсэн. Уг тогтоолоор БНХАУ-тай харилцан тохиролцох арга хэмжээ авах ёстой байсан ч энэ ажиллагаа хийгдээгүй байна.