Цахим хөгжил, инновац, харилцаа холбооны яамнаас төрийн нийт үйлчилгээнд нэгдсэн тооллого хийж, Монгол Улсад төрийн үйлчилгээний хэдэн хувь нь цахим хэлбэрт шилжсэн талаарх тоон мэдээллийг нэгтгэн гаргажээ. Уг тооллогын дүн болон иргэн, хуулийн этгээдэд үзүүлэх цахим үйлчилгээний шинэчлэлийн талаар Цахим хөгжил, инновац, харилцаа холбооны сайд Э.Батшугар мэдээлэл өглөө.

Тэрээр “Төрийн үйлчилгээнд хийсэн тооллоготой холбоотойгоор бид үндсэн нэгдсэн портал нээсэн. Өнөөдрөөс эхлэн уг портал олон нийтэд нээлттэй болж байна. Тооллогын дүнгээс харахад Монгол Улсад нийт 1392 төрийн байгууллага ямар нэгэн хэлбэрээр төрийн үйлчилгээ үзүүлж байна. Эдгээр байгууллага 3189 төрлийн үйлчилгээ үзүүлдэг гэсэн тоо гарсан. Үүнээс 2277 үйлчилгээ буюу нийт үйлчилгээний 77 хувь нь ямар нэгэн байдлаар цахимжсан байна. Харин нэн шаардлагатай атлаа цахимжуулаагүй 822 үйлчилгээ байна. Бид бодлогын зөвлөмжийн хүрээнд нийтийн үйлчилгээний 90 хувийг цахимжуулах зорилт тавьсан. Иймээс одоо цахимжуулаагүй байгаа 822 үйлчилгээг шат дараатайгаар цахим хэлбэрт шилжүүлэхээр ажиллаж байна.

Засгийн газрын хуралдаанаар хэлэлцсэн дараагийн чухал асуудал бол төрийн мэдээллийн нэгдсэн сан, дата баазын ашиглалт юм. Одоогийн байдлаар төрийн нийт дата баазын 80 хувь нь Төрийн үндэсний дата төвд байршиж байгаа ч байгууллагууд хоорондоо мэдээлэл солилцохгүй байна. Нийтийн мэдээллийн ил тод байдлын тухай хуульд төр өөрт байгаа мэдээллийг иргэнээс дахин шаардахгүй байх ёстой гэж тодорхой заасан. Бид эхлээд аль үйлчилгээ цахимжсан, аль нь цахимжаагүйг тодорхойлсон. Дараагийн шатанд аль үйлчилгээнд Хур систем ажиллахгүй байгааг тогтоосон. Одоо үйлчилгээнүүдийг үе шаттайгаар Хур системд холбож, мэдээллийг байгууллагууд хооронд шууд солилцдог болгох ажлыг хийж байна. Ингэснээр төр өөрт байгаа мэдээллийг иргэнээс нэхэхгүй байх нөхцөл бүрдэнэ. Мөн тооллогын явцад маш олон давхардсан үйлчилгээ илэрсэн. Бараг 20 мянга орчим давхардал бүртгэгдсэнийг шүүж нэгтгэснээр 3189 орчим бодит үйлчилгээний жагсаалт гарсан. Ингэснээр төрийн үйлчилгээ илүү цэгцтэй болж, шинэ порталын хүрээнд иргэдийн хяналтад нээлттэй орж байна.