Сүүлийн жилүүдэд цахим орчинд үйлдэгдэж буй залилах гэмт хэрэг огцом өсөж, хэнд ч тохиолдож болох өдөр эрсдэл болжээ. Гар утас, нийгмийн сүлжээ, интернэт банк, цахим худалдаа өргөн хэрэглээнд нэвтэрсэн нь иргэдийн амьдралыг хөнгөвчилсөн ч үүний зэрэгцээ залилагчдад шинэ боломж нээсээр буй. Тиймээс үүнийг уншиж буй та цахим залилангийн талаар тодорхой мэдээлэлтэй болсон бол түүнийгээ ойр дотны хүмүүстээ хэлж анхааруулснаар энэ төрлийн гэмт хэргээс урьдчилан сэргийлэх боломж бүрдэх юм. 

Мөн цахим залилан бүх насны хүмүүсийг хамардаг ч насны бүлэг бүрд өөр өөр хэлбэрээр илрэх нь элбэг байна. Тиймээс учирч болох эрсдэлээс сэргийлэхийн тулд тухайн гэмт хэргийн үйлдэгдэж буй арга, хэн рүү ямар төрлийн залилан түлхүү чиглэж байгаа тухай мэдэж байх нь илүүдэхгүй. Ахмад настан, залуус, өсвөр үе гэх мэт насны ангиллаар хүмүүс ямар төрлийн цахим залиланд түлхүү өртөж байгаатай жишээгээр танилцацгаая.

Ахмад настан: “Албан ёсны” гэх нэрийн дор ирдэг залилан

Ахмад настнууд цахим залиланд өртөхдөө ихэвчлэн айдас, итгэлээ ашиглуулсан байдаг. Банк, төрийн байгууллага, эсвэл нэр хүндтэй компанийн нэр барьсан мессеж, имэйл тэдэнд хамгийн их нөлөөлдөг байна. “Таны данс хаагдах гэж байна”, “Тэтгэврийн нэмэгдэл авах эрх үүслээ”, “Та азтан боллоо” гэх мэт мессежүүд нь ахмад настныг сандаргаж, баярлуулахын зэрэгцээ шуурхай үйлдэл хийхэд хүргэдэг.

Бодит жишээнүүдээс харахад ахмад настнууд хуурамч банкны холбоосоор орж, картын мэдээллээ оруулснаар хэдэн сая төгрөгөө нэг дор алдсан тохиолдол цөөнгүй. Зарим нь тэтгэврийн зээл зуучилна гэсэн заранд итгэж, урьдчилгаа нэрээр мөнгө шилжүүлээд эргэж холбоо барих боломжгүй болсон байдаг.