Багш, эмч нарын цалин нэмэгдсэн гэх мэдээлэл бодит байдалд нийцэхгүй, Засгийн газар олон нийтийг төөрөгдүүлсэн мэдээлэл өгч байгаа талаар Ардчилсан намаас мэдээллээ. Өнөөдөр АН-ын ээлжит 4:11 мэдээллийн цаг болж УИХ дахь АН-ын бүлгийн гишүүд болон АН-ын Ерөнхий нарийн бичгийн даргын үүргийг түр орлон гүйцэтгэгч Д.Амарбаясгалан нар оролцож мэдээлэл өгөв.

Тэд багш нарын цалин, нийгмийн баталгаатай холбоотой асуудлыг хөндөж, бодлогын түвшинд бодитой шийдэл хэрэгтэй байгааг онцлов. Багш нарын цалин нэрлэсэн дүнгээр өссөн мэт харагдавч инфляцын өсөлтийг гүйцэхгүй байгаа нь бодит орлогыг бууруулжээ. Түүнчлэн боловсролын салбарын үр ашиггүй бүтэц, санхүүжилтийн оновчгүй хуваарилалт нь багш нарын хөдөлмөрийн үнэлгээг бууруулж байгааг эдийн засгийн тоо баримтад тулгуурлан танилцуулсан юм.

УИХ-ын гишүүн Г.Ганбаатар: Би Мандалговь, Сайншанд зэрэг аймгуудад ажиллаад ирлээ. Хөдөө орон нутагт УИХ-аас баталсан бодлого, шийдвэр, хууль тогтоомжийн хэрэгжилт үнэхээр хангалтгүй байна. Цаасан дээр батлагдсан шийдвэрүүд бодит амьдрал дээр хэрэгжихгүй байгаа нь тодорхой харагдсан. УИХ өнгөрсөн онд 2026 оны улсын төсвийг батлахдаа багш нарын цалинг 50 хувиар, өөрөөр хэлбэл 724 мянган төгрөгөөр нэмэхээр тусгасан. Ингэхдээ арваннэгдүгээр сарын 1-нээс эхлэн эхний ээлжид 25 хувиар нэмэгдүүлж, багш нарын цалинг нийтдээ 2 сая 800 мянган төгрөгт хүргэхээр тооцож, үүний эх үүсвэрт 518.5 тэрбум төгрөгийг баталсан.