АНУ-ын Ерөнхийлөгч Дональд Трамп даваа гарагт Энэтхэгийн Ерөнхий сайд Нарендра Модитой утсаар ярилцсаны дараа АНУ болон Энэтхэг худалдааны хэлэлцээрт хүрсэн гэж мэдэгдлээ. Энэ хэлэлцээрийн дагуу АНУ Энэтхэгээс импортолж буй бараанд ногдуулах татварыг 25 хувиас 18 хувьд бууруулах ажээ.

Трамп өөрийн Truth Social сүлжээнд бичсэн мэдэгдэлдээ Энэтхэг худалдааны саад бэрхшээлүүдээ бүрэн арилгаж, татвар болон тарифын бус хязгаарлалтуудыг тэглэнэ гэж мэдэгджээ. Мөн Энэтхэг Оросын нефтийг худалдан авахаа зогсоохоор тохиролцсон гэж Трамп хэлсэн байна. Үүнтэй холбоотойгоор Энэтхэгийн Оросоос нефть авахгүй байсны төлөө АНУ өмнө нь ногдуулсан 25 хувийн шийтгэл татварыг багасгаж байгаа аж.

Мөн Энэтхэг улс цаашид АНУ-аас энерги, технологи, хөдөө аж ахуй, нүүрсний бүтээгдэхүүн зэрэг 500 тэрбум ам.доллараас их үнэлгээтэй бараа бүтээгдэхүүн худалдан авахаар тохиролцсон байна.

Энэтхэг ба АНУ-ын хоорондох худалдааны харилцаа өнгөрсөн 2025 онд АНУ Энэтхэгээс импортолдог бараанд 50 хувийн татвар ногдуулснаас хойш хурцадмал байдалд орж байв. Энэхүү өндөр татвар нь Энэтхэгийн Оросоос нефть худалдан авсан явдалтай холбоотой нэмэгдсэн юм.

Энэтхэгийн Ерөнхий сайд Нарендра Моди олон нийтийн сүлжээнд “АНУ-тай тохиролцоонд хүрсэндээ баяртай байна” гэж бичжээ. Тэрээр “Made in India” (Энэтхэгт үйлдвэрлэсэн) бүтээгдэхүүнүүдэд 18 хувийн шинэ татвар тогтоосныг өндрөөр үнэлсэн байна. Тохиролцоо Энэтхэгийн экспорт АНУ-д огцом буурсан үед гарч байна. Өндөр татварууд 2025 онд Энэтхэгийн зах зээлийг “хөгжиж буй орнуудын дундах хамгийн муу гүйцэтгэлтэй зах зээл” болгож, гадаадын хөрөнгө оруулалт их хэмжээгээр урсахад нөлөөлжээ.

АНУ, Энэтхэг хоёр улс худалдааны харилцаагаа сайжруулахын тулд олон жилийн турш хэлэлцээр хийж байсан бөгөөд энэ тохиролцоо нь Азийн бусад орнуудтай харьцуулахад тарифын түвшинг ойртуулж байгаа гэж шинжээчид дүгнэж байна.