Ардчилсан намаас долоо хоног бүрийн пүрэв гарагт зохион байгуулдаг "4:11" хурлаа хийлээ. Энэ удаагийн хурлаар АН-аас Засгийн газрыг зарим сайд нартаа яаралтай хариуцлага тооцохыг шаардаж, мөн УИХ дахь АН-ын бүлгийн гишүүдийн санаачилж байгаа “Эдийн засгийн эрх чөлөөний тухай” шинэ хуулийн төслийн талаар мэдээлэл өглөө.
Засгийн газар сайд нартаа хариуцлага тооцохгүй бол ард түмнээс МАН-ыг чөлөөлөх улс төрийн акцыг эхлүүлнэ
Ардчилсан намын Ерөнхий нарийн бичгийн даргын үүргийг түр орон гүйцэтгэгч Д.Амарбаясгалан: Ардчилсан нам 21 аймаг, есөн дүүрэг, 330 суманд 200 гаруй мянган гишүүнтэй үндэсний хэмжээний намын хувьд УИХ дахь бүлэг болон бүлгийн гишүүдийн гаргасан улс төрийн байр суурийг дэмжиж, Засгийн газартай хариуцлага тооцох асуудлыг өрнүүлнэ гэдгээ хариуцлагатайгаар мэдэгдэж байна. Тодруулбал, УИХ-ын гишүүн Ө.Шижирийн тавьж буй шаардлагын дагуу Засгийн газар Эрчим хүчний сайд Б.Чойжилсүрэн, Шадар сайд Т.Доржханд нарыг ойрын хугацаанд чөлөөлөхгүй бол Ардчилсан намын зүгээс Засгийн газрыг огцруулах акц өрнүүлнэ. 2023 оноос хойш хоёр парламент, гурван Засгийн газар дамнан ажилсан Эрчим хүчний сайд Б.Чойжилсүрэн 100 хоногт асуудлаа шийднэ гэж байгаа нь гэдэг цаг хожих гэж байгаа арга. Өнөөдрөөс тооцвол 100 хоногийн хугацаа нь тавдугаар сар хүртэл буюу орон сууцны дулааныг зогсоодог хугацаатай давхцаж байна. Энэ үед иргэдийн эрчим хүчний хэрэглээ буурсан байдаг. Засгийн газрын өнөөгийн байдал, ард түмэнд учруулж буй дарамт нь МАН-аас ард түмнээ чөлөөлөх нөхцөл байдалд хүргэж байна. Иймээс дээрх Засгийн газрын гишүүдэд яаралтай хариуцлага тооцохгүй бол ард түмнээс МАН-ыг чөлөөлөх улс төрийн акцыг эхлүүлж, Ардчилсан нам УИХ дахь Ардчилсан намын бүлэгтээ улс төрийн дэмжлэг үзүүлж, орон даяар Засгийн газарт хариуцлага тооцох акцыг өрнүүлэх болно.
УИХ-ын гишүүн Г.Очирбат: Эрчим хүч, эрүүл мэнд, боловсролын салбартай холбоотой бүх нийгмийн байдал хүндрэлтэй байна. Үүнтэй холбогдуулаад Ардчилсан намын бүлэг иргэд, аж ахуй нэгжээс “Эдийн засаг эрх чөлөөний тухай хууль”-ийг батлахгүй бол Үндсэн хуулийн 5.2 болон 5.4 заалтууд хэрэгжихгүй байна гэж анхааруулж, сануулж энэ хуулийн төслийг боловсруулах санаа дэвшүүлсэн. Ардчилсан намын дарга О.Цогтгэрэл санаачлаад, Ардчилсан намын дэд дарга Б.Жаргалан боловсруулж, энэ хуулийн төсөл эцсийн байдлаар боловсруулагдаад хэлэлцүүлэх шатандаа явж байна. 50 гаруй аж ахуй нэгж, байгууллагууд болон мэргэжлийн холбоотууд ирээд Ардчилсан намын бүлэг, гишүүдийн санаачилсан энэ хуулийг дэмжинэ гэдгээ илэрхийлсэн.
Энэ хуулийн давуу тал бол “Эдийн засгийн эрх чөлөөний тухай хууль” гэсэн таван бүлэг 19 зүйлтэйгээр шинэ хуулийн төслийн санаа дэвшүүлсэн. Өмнөх өргөн барьсан хууль гурван бүлэг есөн зүйлтэй хэтэрхий энгийн, Засгийн газарт тал зассан маягийн хуулийн төсөл ирж байсан. Энэ дээр Эдийн засгийн байнгын хорооны гишүүд болон бусад гишүүд хойшлуулах чиглэл өгсөн. Хойшилсон хугацаанд Ардчилсан намын гишүүдийн “Эдийн засгийн эрх чөлөөний тухай хууль”-ийг Засгийн газраас өргөн барьсан хуультай хамтатгаад “Эдийн засгийн эрх чөлөөний тухай хууль”-ийг боловсруулах ажлын хэсэг гарсан байгаа. Энэ ажилд Ардчилсан намаас гурваас дөрвөн гишүүн ажиллахаар болсон.
Ардчилсан намын Нарийн бичгийн дарга, УИХ дахь Ардчилсан Намын бүлгийн зөвлөх А.Батпүрэв: Шинээр өргөн барьж байгаа хуулийн төсөл яагаад нэн чухал вэ гэхээр 2016 оноос 2025 онд нийт 100 мянган бизнес шинээр бүртгэгдсэн боловч 60 хувь нь буюу 62 мянган бизнес амжилтгүй болж хаалгаа барьсан байна. Өндөр хүүтэй хүртээмжгүй санхүүжилт, татвар хураамж, хяналт шахалт авлигын дарамт, эрчим хүч дэд бүтцийн найдваргүй байдал хааж боосон зохицуулалт, банкны зээл хаалгаа барихад шууд нөлөөлж байна. Монгол Улсад шинэ бизнес эхлүүлээд хоёр жилээс хэтрэхгүй хугацаанд хаалгаа хааж байна. Үүний гол шалтгаан төр өөрөө.
