Засгийн газрын ээлжит хуралдаанаар багш нарын цалин хангамжтай холбоотой асуудлын талаар Боловсролын сайд П.Наранбаярын мэдээллийг сонссон байна. Монголын багш нарын Үйлдвэрчний эвлэлээс өнөөдөр мэдээлэл хийж, "Багш нарын сарын сүүл цалин өнөөдрийг хүртэл буугаагүй, цаашлаад багш нарын цалин 2026 оны нэгдүгээр сараас 50 хувиар нэмэгдэнэ гэж Засгийн газраас мэдэгдсэн ч бодит байдал дээр нэмэгдсэнгүй, харин ч хасагдаж байна" гэж мэдэгдсэн. Тиймээс Засгийн газрын хэлэлцээрээр хүлээсэн үүргээ биелүүлэхийг шаардсан юм. Багш нарын цалингийн нэмэгдлийн талаар Боловсролын сайд П.Наранбаяр мэдээлэл өглөө.

Тэрээр "Багш нарын цалин ямар хэлбэрээр нэмэгдсэнийг тайлбарлая. Төрийн сан нэгдүгээр сарын дундуур нээгдэж, цалингууд тавигддаг. Үүнтэй холбоотойгоор одоо цалин олгох ажил явагдаж байна. Багшийн үндсэн цалин бодитоор 50 хувь нэмэгдсэн. 2025 оны нэгдүгээр сард ЕБС-ийн багшийн үндсэн 1,484,000 төгрөг байсан. Тэгвэл 2026 оны нэгдүгээр сараас 2,126,000 төгрөг болж өссөн. Нийт 700 гаруй мянган төгрөгөөр буюу 50 хувиар нэмэгдсэн. Сургуулийн өмнөх боловсролын багш нарын үндсэн цалин 1,559,000 төгрөг байсан бол 3,039,500 төгрөг болсон. Энэ бол бодит өсөлт шүү. Ер нь үндсэн цалин 50 хувь, нэмэгдэл цалин 50 хувийн харьцаа руу орсон байсан. Бид цаашид олон төрлийн нэмэгдэл гэхээс илүү үндсэн цалинг өсгөж, багшийн амьдралын баталгаа, амьжиргаанд нөлөөлөх бодлого барих ёстой гэж үзэж байгаа. Өөрөөр хэлбэл, багшийн үндсэн цалинг өсгөж, зарим нэмэгдэл байхгүй болно гэсэн үг.

Өнөөдөр шинэ багш ямар нэгэн нэмэгдэлгүйгээр 2,226,000 төгрөгийн үндсэн авч байгаа. Алба хаасан хугацааны нэмэгдэл буюу 20 жил багшилсан бол 20 хувийн нэмэгдлээ авна. Энэ бол байх ёстой нэмэгдэл. Мөн мэргэжлийн зэрэг, ур чадвар, орон нутгийн нэмэгдлийг хэвийн олгоно. Сум, аймагт ажиллаж байгаа багш нарт 20/40 хувиар тооцож нэмэгдэл олгож байсан. Өнгөрсөн жилийн орон нутгийн нэмэгдэл хэвээрээ үргэлжилнэ.