Боловсрол, эрүүл мэндийн салбарын ажилтнуудын зохион байгуулсан тэмцлийн үр дүнд цалин хөлс нэмэгдсэнтэй холбогдуулан, уг нэмэгдлийг хамтын хэлэлцээрийн дагуу бүрэн хэрэгжүүлэх ёстой гэсэн хүлээлт нийгэмд үүссэн. Гэвч сүүлийн үед ажилчдад олгогдох ёстой цалингийн нэмэгдэл бүрэн олгогдохгүй байгаа талаар олон нийтийн дунд маргаан, ойлгомжгүй байдал бий болоод байна. Энэхүү асуудлын талаар бодит нөхцөл байдлыг тайлбарлаж, байр сууриа илэрхийлэх зорилгоор Монголын Боловсрол, Шинжлэх Ухааны Үйлдвэрчний Эвлэлийн Холбоо, Монголын Эрүүл Мэндийн Ажилтны Үйлдвэрчний Эвлэлийн Холбоо хамтран хэвлэлийн хурал зохион байгууллаа.

Боловсрол, Шинжлэх Ухааны Үйлдвэрчний Эвлэлийн Холбооны дарга З.Цогтгэрэл: Боловсролын салбарын нийт ажилтны цалин 2026 оны нэгдүгээр сараас 50 хувиар нэмэгдэх шийдвэр гарсны дараа багш нарын ажил хаялт өндөрлөж, сургуулиуд хэвийн горимоор ажиллаж эхэлсэн. Гэвч өнөөдрийн байдлаар цалин хөлсний нөхцөл байдал хөрсөн дээр ямар байгаа вэ гэдгийг тодруулах шаардлагатай байна. Өнөөдрийг хүртэл маш олон багш ажилчдаас гомдол, санал ирсээр байгаа бөгөөд бид Засгийн газрыг хэлэлцээрээр хүлээсэн үүргээ биелүүлэхийг шаардаж байна.

Монгол Улсад боловсролын салбар хүний нөөцийн дутагдалтай, хөдөлмөрийн нөхцөл, судалгаа шинжилгээний ажил доод түвшинд байгаа нь бодит байдал. Үүнийг сайжруулахын төлөө улс орны хөгжлийг цаашид урагшлуулахын тулд багш ажилчдын хөдөлмөр, тэмцлийн үйл ажиллагаанууд хийгдсэн. Өнгөрсөн онд боловсролын салбарт 5000 хүний дутагдал байсан бол энэ онд нөхцөл байдал улам хүндэрч байна.