Ерөнхийлөгч У.Хүрэлсүх Эрчим хүчний сайд Б.Чойжилсүрэн, Шадар сайд Т.Доржханд нартай уулзаж, эрчим хүчний салбарын нөхцөл байдлын талаар мэдээлэл авсан. Эрчим хүчний сайд Б.Чойжилсүрэн Ерөнхийлөгчтэй уулзсаны дараа хэвлэлийнхний асуултад хариуллаа.

Тэрээр “ТЭЦ-4”-т гэмтэл гарснаар сүүлийн долоо хоногийн турш эрчим хүчний хязгаарлалт хийхээс өөр аргагүйд хүрсэн. Хэрэглээг хязгаарлахгүй бол улсаараа цахилгаангүй болох, хөлдөлт үүсэх эрсдэлтэй юм. Өнөөдөр оргил ачаалал дуусгаад нэг зуух зогсоож 500 градусыг 50 градус болгон бууруулж, эвдрэл юунд байгааг олж тогтооно. ТЭЦ-4-ийхан засвар хийхэд 48 цаг шаардлагатай гэсэн мэдээлэл өгч байгаа. Нэгэнт чадлын дутагдалд орсон нөхцөлд хөлдөлт үүсэж болзошгүй. Мөн хэрэглээг хязгаарлахгүй бол систем тэг зогсолт хийх аюултай. Тэгвэл улсаараа тог цахилгаангүй болох аюултай.

Нийслэлд нийт 69 ажиллагаатай эрчим хүчний зуух байдгаас 49 зуухыг дахин засварлах шаардлагатай ба нэг зуухыг засахад ойролцоогоор 90 сая ам.доллар шаардлагатай байна. Манай улсад 660 мвт-ын нэг цахилгаан станц барихад дөрвөн их наяд хэрэгтэй. Гэтэл манай улсын нэг жилийн төсвийн хөрөнгө оруулалт гурван их наяд төгрөг. Тиймээс цахилгаан станцыг төсвийн хөрөнгөөр барих боломжгүй. Цахилгаан станц нэмэлтээр барих эсвэл эвдрэлтэй байгаа зуухнуудаа зассанаар Монгол Улс 2027 он гэхэд эрчим хүчний асуудалгүй болно" гэлээ.

Бэлтгэсэн Б.Мөнхзул