Саяхан танилцуулсан статистик мэдээллээр төрөлтийн тоо буурсаар Монгол Улсын хүн амын цэвэр өсөлт сүүлийн 20 жилийн хамгийн бага түвшинд хүрчээ.

Тодруулбал, 2025 онд улсын хэмжээнд 56.7 мянган хүүхэд төрсөн нь 2024 оныхоос 5.8 хувиар буурсан үзүүлэлт бөгөөд 1000 хүнд ногдох төрөлтийн хэмжээ 16.3 хувьтай гарлаа. 2024 онд 57.3 мянган хүүхэд төрж байсан нь мөн л өмнөх оныхоосоо 10.3 хувиар буурсан үзүүлэлт байв. Үүнээс яг 10 жилийн өмнө манай улсын төрөлтийн тоо дээд рекордоо эвдэж 82.8 мянган хүүхэд төрж байсан юм. Тэгэхээр 2025 оны төрөлтийн хэмжээ 2014 оны рекордоос 31.6 хувиар буурсан болж таарч байна. Сүүлийн зургаан жилийн турш төрөлтийн тоо тасралтгүй буурч, жилд дунджаар 3.8 мянгаар хорогдсоор байна.

Хэрэв энэ чиглэлд зохистой, урт хугацааны хүн амын бодлого хэрэгжүүлэхгүй бол ойрын хэдэн арван жилд хөдөлмөрийн зах зээл, нийгмийн хамгааллын тогтолцоонд дарамт нэмэгдэх эрсдэл бодитоор тулгарна. Харин одооноос бодлогын түвшинд уян хатан, урьдчилсан арга хэмжээ авч чадвал Монгол Улс хүн ам зүйн шилжилтийг харьцангуй зөөлнөөр даван туулах боломж бий. Тиймээс төрөлтийг дэмжих талаар дэлхийн улс орнууд ямар арга хэмжээ авч буйг харгалзан үзэх нь зүйтэй.

Сүүлийн жилүүдэд дэлхийн олон улс төрөлтийн түвшин огцом буурч, хүн амын хурдтай хөгшрөлт, хөдөлмөрийн зах зээлийн агшилт зэрэг сорилттой нүүр тулж байна. Үүний хариуд Засгийн газрууд хүүхэд төрүүлэх, өсгөх шийдвэрийг дэмжих зорилгоор төрөл бүрийн санхүүгийн урамшуулал, нийгмийн халамж, хөдөлмөрийн бодлогын цогц арга хэмжээг хэрэгжүүлж эхэлжээ. Эдгээр туршлагыг ажиглахад зөвхөн мөнгөн дэмжлэг бус, амьдралын чанарт чиглэсэн бодлого илүү үр дүнтэй болох нь харагдана.