Ардчилсан намаас “4/11 мэдээллийн цаг” хэвлэлийн бага хурлыг өнөөдөр зохион байгууллаа. Тус хэвлэлийн хурлаар эрчим хүчний салбарт үүсээд буй нөхцөл байдлын талаар тодорхой улс төрийн дүгнэлт хийх, цаашид баримтлах бодлогын байр сууриа олон нийтэд танилцуулах шаардлагатай гэж үзэж байгаагаа илэрхийллээ.

УИХ-ын гишүүн Ө.Шижир: Өнгөрсөн хугацаанд Монголын улстөрчид асуудлыг дандаа ирээдүй цаг дээр ярьж ирсэн. Хоёр жилийн дараа сайхан болно, дөрвөн жилийн дараа, аравхан жилийн дараа дэндүү сайхан болно гэх мэт худлаа амлалтуудыг байнга өгдөг байсан нь өнөөдөр тод харагдаж байна. Харин одоо манай иргэд хэрсүү болж, ийм хоосон амлалтад дахиж итгэхгүй болсон гэж найдаж байна.

Өнөөдрийн бодит байдал дээр эрчим хүчний аюулгүй байдал бүрэн алдагдчихлаа. 2024 онд тог, цахилгааны үнэ нэмэгдсэнтэй холбоотойгоор иргэдэд үүссэн эдийн засгийн хүндрэл, худалдан авах чадварт үзүүлж буй нөлөөллийн талаар манай бүлгийн ажлын алба судалгаа хийсэн. Үүний үндсэн дээр бид улс төрийн тодорхой дүгнэлт, шийдвэр гаргах ёстой гэж үзсэн юм.

Сүүлийн нэгхэн жилийн дотор ТЭЦ-3, ТЭЦ-4 дээр ноцтой асуудлууд дараалан гарч, бүр дэлбэрэлт болж, хүний амь нас эрсэдсэн харамсалтай тохиолдол ч гарлаа. Харамсалтай нь үүнд хэн ч хариуцлага хүлээхгүй байна. Хариуцлага хүлээдэг тогтолцоо Засгийн газарт үндсэндээ үгүй болчихжээ.