Монгол Улсад хавдартай хүүхдэд цусны үүдэл эс шилжүүлэн суулгах эмчилгээг анх удаа амжилттай хийсэн талаар мэдээлэл хийлээ. Хэвлэлийн хуралд  Эрүүл мэндийн сайд Ж.Чинбүрэн, БНТУ-аас Монгол улсад суугаа онц бөгөөд бүрэн эрхт элчин сайд Башак Гэнч Юксэл, УНТЭ-ийн ерөнхий захирал Л.Бямбасүрэн, ЭХЭМҮТ-ийн ерөнхий захирал Ж.Отгонбаатар болон холбогдох эмч мэргэжилтнүүд оролцлоо.

Манай улс БНТУ-ын Медикл Парк эмнэлэг болон ТИКА олон улсын байгууллагатай хамтран 2025 оны арванхоёрдугаар сард 15 настай хүүхдэд үүдэл эс шилжүүлэн суулгах хагалгааг анх удаа амжилттай хийжээ. Тус хагалгааг хийхэд БНТУ-ын ТИКА олон улсын байгууллага шаардлагатай тоног төхөөрөмжөөр тусалжээ. Энэхүү хагалгааг амжилттай хийснээр Монгол Улсад хүүхдийн цусны хавдрын эмчилгээний хөгжилд өндөр ач холбогдолтойг албынхан онцоллоо. Тус хагалгааны зардлыг ТИКА олон улсын байгууллага гаргасан байна. Хагалгаанд орсон охины бие маш сайн байгаа аж. Цаашдаа БНТУ, Медикл Парк эмнэлэг болон ТИКА олон улсын байгууллагатай хамтран хоёр дахь өвчтөнд өөрөөс нь өөрт нь үүдэл эс шилжүүлэн суулгах, гурав дахь өвчтөнд донороос шилжүүлэн суулгах гэрээ хийжээ. Мөн Турк улсад манай 5 эмч, сувилагчийг энэ чиглэлээр сургалтад хамруулах юм байна.

Энэ төрлийн хагалгааг гадаад улсад 350-500 сая төгрөгөөр хийлгэдэг байсан бол Монгол Улсад нутагшуулснаар 70-120 сая төгрөгөөр хийх боломжтой юм байна. Цаашдаа хагалгааг тогтвортой хийдэг болсны дараа Эрүүл мэндийн даатгалд хамруулах боломжтой гэдгийг ЭМ-ийн сайд Ж.Чинбүрэн хэллээ.

ЭХЭМҮТ-ийн ерөнхий захирал Ж.Отгонбаатар: Монгол Улсад жилд 100 орчим хавдрын тохиолдол бүртгэгддэг бөгөөд үүний 50-60 нь цусны хавдар эзэлдэг. Үүнээс 5-6 тохиолдол нь ясны чөмөг шилжүүлэн суулгах шаардлагатай байдаг. 2020.12.09-нд 15 настай охинд Улсын нэгдүгээр төв эмнэлгийн хамт олон болон БНТУ, Медикл Парк эмнэлгийн хамт олон ясны чөмөг шилжүүлэн суулгах хагалгааг анх удаа хийсэн. Бид цаашид ясны чөмөг шилжүүлэн суулгах мэс заслыг нутагшуулахаар ажиллаж байна.