Улсын гуравдугаар төв эмнэлэг (УГТЭ) 2025 онд зүрх судасны мэс заслын чиглэлээр дөрвөн шинэ дэвшилтэт технологийг амжилттай нэвтрүүлж, бүрэн нутагшуулж чаджээ. Ингэснээр гадаад улсад эмчлүүлэх иргэдийн урсгалыг бодитойгоор бууруулж байна.
Тус эмнэлэг 2025 онд нийт 1206 хүнд зүрх судасны мэс заслын тусламж үйлчилгээг үзүүлжээ. Үүнээс 191 хүнд зүрхний төрөлхийн гажгийн нээлттэй мэс заслын эмчилгээг хийсэн бөгөөд нийт хийгдсэн мэс заслын үйлчилгээний 18.7 хувь буюу 226 тохиолдол нь 0–16 насны хүүхэд эзэлж байна. Гол судасны хүнд хэлбэрийн хуулрал, нарийслын үед хавхалгыг хиймэл хавхлагаар солихгүйгээр өөрийн хавхлагыг хадгалан нөхөн сэргээх мэс заслыг титэм судасны эмгэгтэй хавсарч хийх мэс заслыг Монгол Улсад анх удаа амжилттай гүйцэтгэлээ.
Хүүхдийн зүрхний хавхлага болон гол судасны угийн хэмжээ жижиг байдгаас шалтгаалан хиймэл хавхлага хэрэглэх боломж хязгаарлагдмал байдаг тул хавхлагыг засах, нөхөн сэргээх мэс засал эмчилгээний гол сонголт болдог. Энэ хүрээнд “Бо-Ян”-ны техникийг ашиглан механик протезоор солих мэс заслыг тус эмнэлгийн зүрх судасны мэс заслын баг анх удаа Монгол Улсад нэвтрүүллээ.
УГТЭ зүрхний нээлттэй, Митрал хавхлагын халдварт эндокардиттай эмчлүүлэгчид Минимал инвазив хүрцээр митрал хавхлага солих мэс заслыг мөн анх удаа бие даан гүйцэтгэлээ. Дотоодын баг “J” хэлбэрийн зүслэгээр минимал-инвазив хүрцээр гол судасны хавхлага солих” мэс заслыг Монгол Улсад анх удаа нэвтрүүлсэн нь энэ юм. Энэхүү технологи нь өвчтөний эмнэлэгт хэвтэх хугацааг 2-3 хоногоор богиносгож, шархны эдгэрэлтийг түргэсгэх давуу талтай арга юм.
Улсын гуравдугаар төв эмнэлгийнхэн Люксембургийн их Гүнт улс, Франц, Герман, БНСУ, Япон, Тайвань, Австрали зэрэг улсын тэргүүлэх эмнэлгүүдтэй 10-25 жил гаруй хугацаанд тасралтгүй хамтран ажилласны үр дүнд титэм судасны хүнд хэлбэрийн нарийсал, хүүхдийн хавсарсан хөх, хүнд хэлбэрийн зүрхний төрөлхийн гажиг, гол судасны хүнд хэлбэрийн цүлхэн хуулрал, CABG, OPCAB, Bentall, David, TEVAR, EVAR, MIDCAB зэрэг өндөр түвшний мэс заслуудыг ийнхүү эх орондоо бүрэн нутагшуулаад байна.
Үүний үр дүнд 2022-2025 онд зөвхөн эрүүл мэндийн даатгалын үндэсний зөвлөлийн тогтоолын тарифаар 17.7 тэрбум төгрөгийн гадагшлах эмчилгээний зардлыг эх орондоо үлдээж, эрүүл мэндийн даатгалаараа өндөр түвшний тусламж үйлчилгээг авах боломжоор ханган эрүүл мэндийн салбарын санхүүжилт, иргэдийн эрүүл мэнд амьдралын чанарт бодит үр нөлөөтэй байна.
Улсын хэмжээнд зүрх судасны мэс заслын тусламж үйлчилгээний ачааллын 93 хувийг үүрч ажиллаж байна. УГТЭ нь цаашид зүрх судасны мэс заслын өндөр түвшний лавлагаа тусламж үйлчилгээг олон улсын жишигт нийцүүлэн хөгжүүлж, иргэдийг эх орондоо чанартай, аюулгүй, эдийн засгийн дарамтгүй, эрүүл мэндийн даатгалаараа эмчлүүлэх боломжийг бүрэн дүүрэн бүрдүүлэхийн төлөө тууштай зорилго тавин ажиллаж байгаа аж.
