Хүйтний улиралд дасгал хийх нь хүний биеийг сэргээж, эрч хүч өгдөг. Гэхдээ халтирч унах, бэртэх зэрэг эрсдэлүүд олон. Тиймээс өвлийн улиралд гадаа дасгал хийхийн өмнө болон дараа биеэ сайн бэлдэх нь чухал.
Хүйтэн үед дасгал хийхэд бэртэх эрсдэл нэмэгдэх хэд хэдэн шалтгаан бий.
Нэгдүгээрт, хүйтэн орчин булчингийн үйл ажиллагаанд ихээхэн нөлөөлдөг. Булчингийн температур биеийн төв температур болох 37°C-ээс доошилбол булчин хатуу, уян хатан чанар багатай болж, гэмтэж бэртэхэд амархан болдог. Мөн булчингийн температур 1°C-ээр буурах бүрд биеийн хүч, чадал гаргах боломж 4–6 хувиар буурдаг байна.
Хоёрдугаарт, хүйтэн температур гар, хөл, алга, тавхайн судсыг агшаадаг (үүнийг судас агших буюу vasoconstriction гэдэг). Ингэснээр ажиллаж буй булчинд очих цусан дахь хүчилтөрөгчийн хэмжээ багасна. Цусны урсгал ийнхүү буурснаар бодисын солилцоо удаашран, дасгалын дараах нөхөн сэргэх хугацаа уртасдаг. Илүү хүйтэнд хөдөлгөөний зохицуулалт алдагдаж, гар хөл бадайрч, халтиргаа, гэмтлийн эрсдэл улам нэмэгдэнэ.
Хүйтэн, чийгтэй орчинд удаан хугацаанд байх нь бичил судасны гэмтэл үүсгэж болзошгүй. Энэ нь эд, мэдрэлийн үйл ажиллагааг сулруулж, зохицуулалт, хариу үйлдлийн хурдыг бууруулан, гэмтлийн эрсдэлийг нэмэгдүүлдэг.
