16 болон 32 настай эмэгтэйчүүдийн амь насыг хөнөөсөн хэрэгт буруутгагдаж буй Ц.Дагвадорж нарт холбогдох шүүх хурлыг 2026 оны нэгдүгээр сарын 22-нд товлолоо. Үүнтэй холбогдуулан шүүхээс Э.Ган-Эрдэнэ, Э.Номин-Эрдэнэ нарыг цагдан хорих хугацааг үргэлжлүүлэх шийдвэр гаргасан байна.

Тодруулбал, 16 настай охины амь насыг хөнөөсөн хэргийн шүүхийн урьдчилсан хэлэлцүүлэг өнөөдөр Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхэд болсон юм. Урьдчилсан хэлэлцүүлгийн нээлтийг олон нийтэд шууд дамжуулсан бөгөөд үүний дараа хурал хаалттайгаар үргэлжилсэн.

Энэ талаар шүүхээс тайлбарлахдаа, “Урьдчилсан хэлэлцүүлэг нь яллагдагч нарын гэм бурууг тогтоох, эрүүгийн хариуцлага хүлээлгэх асуудлыг хэлэлцэхгүй. Харин хэргийг шүүхээр хэлэлцэхэд бэлэн эсэх, яллагдагч нарыг шүүхэд шилжүүлэх үү эсвэл прокурорт буцаах уу гэдгийг шийдвэрлэдэг. Уг хэлэлцүүлэг нь Эрүүгийн хэрэг хянан шийдвэрлэх тухай хуулийн 34.2.1-т заасны дагуу хаалттай явагдаж байна” гэв.

Тус хэрэгт холбогдох урьдчилсан хэлэлцүүлэг өмнө нь 2025 оны есдүгээр сарын 17-нд болж, шүүхээс нэмэлт мөрдөн шалгах ажиллагаа дутуу хийгдсэн гэх үндэслэлээр хэргийг прокурорт буцааж шийдвэрлэж байсан юм.