Эдийн засаг хөгжлийн яам “Хөрөнгө оруулагчийн эрх ашгийг хамгаалах төв”-ийг өнөөдөр нээлээ. Нээлтийн арга хэмжээнд Монгол Улсад суугаа гадаад улсын Элчин сайдын яамд, олон улсын байгууллагууд, бизнесийн холбоод, мөн гадаадын хөрөнгө оруулалттай аж ахуйн нэгжүүдийн төлөөлөл оролцож, төвийн үйл ажиллагаа, зорилго, ач холбогдлын талаар санал солилцсон юм. 

Эдийн засаг хөгжлийн сайд Ж.Энхбаяр: Монгол Улс эдийн засгаа хурдасгах, тэлэх, экспортоо нэмэгдүүлэх, үйлдвэрлэлээ өргөтгөх, ажлын байр бий болгох зэрэг олон чухал зорилтыг дэвшүүлж байгаа. Эдгээрийн суурь нь хөрөнгө оруулалт бөгөөд энэ үйл явц хувийн хэвшлийн манлайлал дор явах ёстой. Гэтэл өнөөдрийн байдлаар хөрөнгө оруулалтын нөхцөл байдал төдийлөн сайнгүй байна. Тиймээс Засгийн газраас Хөрөнгө оруулалтын тухай хуульд нэмэлт, өөрчлөлт оруулах хуулийн төслийг УИХ-д өргөн барьсан. Мөн Зөвшөөрлийн тухай хуулийн хэлэлцүүлэг эхэлсэн бөгөөд Худалдааны зохицуулалтын хуулийг хаврын чуулганаар хэлэлцэхээр төлөвлөж байна. Үүнээс гадна төрийн хяналт шалгалтыг илүү ойлгомжтой, товч тодорхой, зөвлөдөг, дэмждэг, урьдчилан сэргийлдэг хэлбэрт шилжүүлэх шийдвэрийг гаргаад байна.

Засгийн газраас Монгол Улсыг бизнес, хөрөнгө оруулалтад ээлтэй орон болгох шаардлагатай гэж үзэж байгаа тул эрх зүйн орчин, төрийн захиргааны байгууллагын бүтэц зохион байгуулалтад бодлогын томоохон өөрчлөлтүүдийг хийхээр ажиллаж байна.

Энэ хүрээнд “Хөрөнгө оруулагчийн эрх ашгийг хамгаалах төв” байгуулж байгаа бөгөөд энэ төв нь бизнес эрхлэгчдийн эрх ашгийг хамгаалах бодлогыг боловсруулах, хөрөнгө оруулагчдад шаардлагатай хууль эрх зүйн мэдээллийг ил тод, хүртээмжтэй хүргэх чиглэлээр ажиллана. Өнгөрсөн хугацаанд олон хөрөнгө оруулагч Монгол Улсад гомдолтой үлдсэн. Бизнесээ алдсан, хөрөнгө оруулалтаа татсан, залилуулсан тохиолдлууд цөөнгүй бөгөөд шүүхийн шатанд дунджаар тав орчим жил зарцуулж байгаа нь бодит асуудал болж байна. Тиймээс бид шүүхэд хүрэхээс өмнө хөрөнгө оруулагчдын дуу хоолойг сонсож, гомдол, маргааныг шийдвэрлэхэд анхаарч, тэдний төлөөлөл болж ажиллах зорилт тавьсан.

Нөгөө талдаа хууль тогтоомж боловсруулах үйл явцад хөрөнгө оруулагчдын оролцоог хангах шаардлагатай. Өнөөдөр бизнесийн харилцааг зохицуулж буй 200 гаруй хууль байгаа бөгөөд үүний 40 гаруй нь гадаадын хөрөнгө оруулалттай холбоотойгоор бизнесийн үйл ажиллагааг хязгаарласан зохицуулалт агуулж байна. Үүнийг шийдвэрлэх зорилгоор эрх зүйн томоохон шинэчлэлийг өргөн барьсан бөгөөд хаврын чуулганаар хэлэлцэн батална гэж найдаж байна. Мөн энэхүү төв нь мэдээлэл, туршлага солилцох сургалт, судалгааны чиглэлээр ч үйл ажиллагаа явуулах юм.

Хөрөнгө оруулагчдын хууль ёсны эрх ашгийг хамгаалж, өмчийн халдашгүй дархан байдлыг баталгаажуулахын зэрэгцээ эдийн засаг дахь төрийн оролцоог зохистой түвшинд барих, төр ба хувийн хэвшлийн зааг ялгааг тодорхой болгох нь чухал. Энэ ажлыг мэргэжлийн холбоод, хувийн хэвшлийн төлөөлөлтэй байнгын хамтын ажиллагааны хүрээнд хэрэгжүүлнэ.

“Хөрөнгө оруулагчийн эрх ашгийг хамгаалах төв” нь Монгол Улс хөрөнгө оруулагчдынхаа өмнө хүлээсэн үүрэг, амлалтаа биелүүлж, ил тод, хариуцлагатай ажиллана гэдгийн бодит илэрхийлэл бөгөөд бид үйл ажиллагаагаа ийнхүү оны эхэнд эхлүүлж байна.

О.Адъяа: Одоо байгаа хөрөнгө оруулагчдаа хамгаалж, тэдэнтэй шударга, ил тод, тогтвортой харьцах нь шинэ хөрөнгө оруулалт татах хамгийн чухал нөхцөл

Монгол дахь Америкийн худалдааны танхимын гүйцэтгэх захирал О.Адъяа: Монгол Улс өнөөдөр хойд, урд хоёр улсаас эдийн засгийн хувьд ихээхэн хамааралтай байгаа энэ нөхцөлд гуравдагч хөршийн бодлогын хүрээнд хөрөнгө оруулалтыг татах нь нэн чухал байна. Тиймээс боломжит бүх гуравдагч хөршийн хөрөнгө оруулагчдыг Монгол Улсад татах, тэдэнд таатай орчин бүрдүүлэх чиглэлд идэвхтэй ажиллах хэрэгтэй.

Улсын хөгжилд хувийн хэвшлийн гүйцэтгэж буй үүрэг асар чухал. Эдийн засгийн өсөлт, ажлын байр, татварын орлогын гол ачааг хувийн хэвшил үүрч байгаа учраас тэдний амжилтын түүхийг олон нийтэд таниулж, сурталчлах нь зайлшгүй шаардлагатай. Энэ нь нэг талаар дотоодын бизнес эрхлэгчдийг урамшуулахын зэрэгцээ нөгөө талаар гадаадын хөрөнгө оруулагчдад Монгол Улсад бизнес хийх бодит боломж, эерэг жишээг харуулах ач холбогдолтой.

Өнөөдөр Монгол Улсад орж ирээд үйл ажиллагаа явуулж байгаа хөрөнгө оруулагчидтай төр, засаг хэрхэн харьцаж байгааг бусад боломжит хөрөнгө оруулагчид ажиглаж байдаг. Төрийн байгууллагын хандлага, бодит дэмжлэг, маргаан гомдлыг хэрхэн шийдэж байгаа нь тэдний Монгол Улсад хөрөнгө оруулах, эсэх шийдвэрт нөлөөлдөг. Тиймээс одоо байгаа хөрөнгө оруулагчдаа хамгаалж, тэдэнтэй шударга, ил тод, тогтвортой харьцах нь шинэ хөрөнгө оруулалт татах хамгийн чухал нөхцөл юм.

Энэ утгаараа хууль, эрх зүйн шинэчлэлийг бүрэн хүлээлгүйгээр “Хөрөнгө оруулагчийн эрх ашгийг хамгаалах төв”-ийг өнөөдөр нээж, үйл ажиллагааг нь эхлүүлж байна. Энэ нь төрөөс хөрөнгө оруулагчдын асуудалд бодитоор анхаарч, шуурхай ажиллах эрмэлзэлтэй байгаагийн илрэл юм. Мөн Эдийн засаг, хөгжлийн яам сүүлийн үед энэ чиглэлээр ахиц дэвшилтэй, бодит үр дүнд чиглэсэн ажлуудыг хийж байна.