Аймгийн болон сумдын онцгой комиссоос танилцуулсан мэдээллээр Өвөрхангай аймгийн нийт нутгийн 80 хувь нь цастай, 34 хувьд нь зудын өндөр эрсдэл үүсээд байна. Уянга, Нарийнтээл, Баян-Өндөр, Сант, Төгрөг, Баянгол, Гучин-Ус, Өлзийт сумдад өвөлжилт эрс хүндэрч, зарим сумдын өвс тэжээлийн нөөц бүрэн дууссан нөхцөл байдалтай байна.

Одоогоор аймгийн хэмжээнд 133.8 мянган толгой мал гаднын 14 аймгийн 50 суманд отроор өвөлжиж байгаа юм. Өвс тэжээлийн аюулгүйн нөөцийн хангалт аймгийн хэмжээнд 75 хувьтай, харин сумдын түвшинд дунджаар 48 хувьтай байна.

Сант сумын хувьд нийт мал сүргийнхээ 40 хувийг эдийн засгийн эргэлтэд оруулсан боловч 10–12 дугаар сард цас ихээр орж, сумын нийт нутгийн 90 гаруй хувьд цасан бүрхүүл тогтсоноор өвөлжилт хүндэрчээ. Үүний улмаас арваннэгдүгээр сарын 7-ноос эхлэн мал бэлчээрлэх боломжгүй болж, малыг тэжээлд шилжүүлсэн байна. Гэвч малчдын гар дээрх өвс тэжээл дуусч, сумын аюулгүйн нөөцийг малчдад олгосноор уг нөөц мөн бүрэн шавхагджээ. Бэлчээрээс мал өвс идэх боломжгүй болсноос 500 гаруй толгой мал өлдөж хорогдсон байна.

Иймд цаашид дөрвөн сар хүртэлх хугацаанд малыг тэжээх өвс тэжээлийн бүрдүүлэлтэд салбарын яам болон Улсын онцгой комиссоос дэмжлэг үзүүлэхийг хүссэн байна. Мөн сумын хүн эмнэлэг, цагдаагийн байгууллага яаралтай дуудлагаар явах автомашингүй байгаа тул хөнгөлөлттэй үнээр өвс тэжээл олгох, өвөлжилт хүндэрсэн сум, баг, айл өрхүүдийн хооронд зам гаргах, малын бэлчээрт хүрэх жим татахад шаардлагатай туулах чадвар сайтай техник хэрэгсэл, шатахуун, тослох материалын дэмжлэг хэрэгтэй байгааг уламжилжээ.