Аж үйлдвэр, эрдэс баялгийн яам(АҮЭБЯ)-наас өнөөдөр шатахууны нөөцтэй холбоотой мэдээлэл хийлээ. 2026 оны эхний найм хоногт 35,000 тонн АИ-92 шатахуун, 40,000 тонн дизель түлш импортоор авсан аж. Ингэснээр улсын хэмжээнд АИ-92 шатахууны ердийн хэрэглээний 15, дизель түлшний 20 хоногийн нөөцтэй болжээ.
АҮЭБ-ийн дэд сайд Б.Энхтүвшин: 2026 оны нэгдүгээр сарын 8-ны өдрийн байдлаар Улаанбаатар төмөр замд нийт 803 вагон шатахуун байгаа. Үүнээс АИ-92 автобензин 284 вагон буюу 17 мянга 40 тонн, дизель түлш 449 вагон буюу 26 мянга 940 тонн, ТС-1 онгоцны түлш 27 вагон буюу 1 мянга 620 тонн, мөн 43 вагон шингэрүүлсэн шатдаг хий тус тус байна.
Улаанбаатар хот болон хөдөө орон нутагт шатахууны нийлүүлэлт, хангамж хэвийн түвшинд хүрсэн байгаа. Монгол Улс хэрэглэгч улс учраас гэрээ хэлэлцээг дээд түвшинд хийж, харилцан ойлголцолд хүрсний үр дүнд экспорт, импортын урсгал тогтвортой үргэлжилж байна. Энэ оны нэгдүгээр сард нийт 136 мянга 470 тонн АИ-92, АИ-95 бензинийг ОХУ болон БНХАУ-аас импортлохоор баталгаажуулсан. ОХУ-ын есөн компани, БНХАУ-ын нэг компанитай гэрээ байгуулсан. Үүнээс 136 мянга 470 тонн АИ-92 евро-5 стандартын бензин, мөн 148 мянга 90 тонн энгийн түлш авахаар гэрээгээр баталгаажуулсан. бензиний ердийн хэрэглээний 15 хоногийн, дизель түлшний 20 хоногийн нөөцтэй байгаа бөгөөд бүх аймагт шатахуун хүргэгдсэн байна. Харин ганц, хоёр суманд үүсээд байгаа хүндрэлүүдийг тухай бүрд нь шийдвэрлэж ажиллаж байгаа
АҮЭБЯ-ны Газрын тосны бодлогын газрын дарга Ч.Хишигдалай: Нэгдүгээр сард захиалсан шатахууны 50 хувь нь энгийн АИ-92, 50 хувь нь Евро-5 стандартын автобензин. Уг хоёр бүтээгдэхүүн ганц, хоёр удаа хийхэд бол ялгаа нь мэдэгдэхгүй. Евро-5 стандартын бүтээгдэхүүн нь илүү хөнгөн бас илүү шатамтгай. Автомашинаасаа хамаараад энгийн АИ-92-оос 5-10 хувиар илүү зарцуулагдана. Энгийн шатахуун нь илүү ашигтай байна гэж хүмүүс харж байгаа байх. Гэхдээ эрүүл мэнд, хүрээлэн буй орчин, техникээ бодох ёстой. Аажмаар энэ стандартын бүтээгдэхүүн рүү шилжих ёстой.
