2025 оны төгсгөлд НДС-аас олгодог ажилгүйдлийн тэтгэмж, жирэмсэн амаржсаны тэтгэмж, хөдөлмөрийн чадвараа түр алдсаны тэтгэмжийг санхүүжилт дууссанаас үүдэж олгоогүй. Тэгвэл энэ 7 хоногт дээрх тэтгэмжүүдийг нөхөж олгох юм байна. Энэ талаар Нийгмийн даатгалын ерөнхий газрын Бодлогын хэрэгжилт, төлөвлөлтийн газрын дарга Ц.Ганцэцэгтэй ярилцлаа.

-2025 оны аравдугаар сараас хойш ажилгүйдлийн тэтгэмж, жирэмсэн, амаржсаны тэтгэмж, хөдөлмөрийн чадвараа түр алдсаны тэтгэмж олгогдоогүй. Өнгөрсөн онд авч чадаагүй иргэдэд энэ мөнгийг нь нөхөн олгох уу?

-2025 онд ажилгүйдлийн даатгалд 162 тэрбум төгрөгийг олгохоор баталсан. Гэтэл тэтгэвэр авагчдын тооны өсөлт, дундаж тэтгэврийн өсөлт, түүнчлэн аж ахуйн нэгжүүд НДШ-ээ бүрэн төлөхгүй сангийн орлого дутагдаж байгаагаас болоод дээрх тэтгэмжүүдийг аравдугаар сараас хойш олгож чадаагүй. НДС-ийн 2026 оны төсөв УИХ-аар батлагдаад 2026 оны нэгдүгээр сарын 1-ээс хэрэгжиж эхэлсэн. НДЕГ-ын даргын 02 дугаар тушаалаар НДС-ийн орлого, зарлагын хуваариа батлаад явж байна. Өчигдрөөс эхлээд батлагдсан төсвийн хүрээнд санхүүжилтийг өгөөд эхэлсэн.

Ер нь 2026 онд НДС-ийн Ажилгүйдлийн даатгалын сангаас 190 тэрбум төгрөг, Тэтгэмжийн даатгалын сангаас 321 тэрбумыг олгоно. Ажилгүйдлийн даатгалын сангаас ажилгүйдлийн тэтгэмж, Тэтгэмжийн даатгалын сангаас жирэмсний, амаржсаны, хөдөлмөрийн чадвар түр алдсаны, нас барсан даатгуулагчийн ар гэрт олгох гэсэн гурван төрлийн даатгалыг олгож байна. Өнгөрсөн онд Тэтгэмжийн даатгалаас олгодог тэтгэмжүүдийг олгоогүй үлдсэн. Нэгдүгээр сард төсвийн хуваариа нарийвчилж батлаад, өчигдөр 21 аймаг, есөн дүүргийн НДГ-ын санхүүжилтийг хийсэн. Нэгдүгээр сард ажилгүйдлийн тэтгэмжид 45, тэтгэмжийн даатгалын санд 39 тэрбум төгрөгийн санхүүжилтийг олгохоор байна. 2025 оны аравдугаар сараас хойш 14996 хүний ажилгүйдлийн тэтгэмжийн 45 тэрбум төгрөгийг нөхөн олгоно гэсэн үг. Энэ 7 хоногтоо багтаад ажилгүйдлийн тэтгэмжийг бүрэн олгож дуусна.