Засгийн газрын 2025 оны сүүлийн хуралдаанаар Бортээг, Олон-Овоот зэрэг ордуудыг эдийн засгийн эргэлтэд оруулах замаар хүүхэд, ахмад настан, хөгжлийг бэрхшээлтэй иргэдэд нэг сая хүртэл төгрөгийн ногдол ашгийг олгох шийдвэр гаргаснаа зарласан. Үүнд 1.8 сая иргэн хамрагдах бөгөөд 1.8 их наяд төгрөгийг иргэддээ тараах шийдвэрийг Засгийн газар гаргажээ.
Энэ бол ашиглалтад ороогүй ордыг барьцаалж, иргэддээ бэлэн мөнгө тараах анхны шийдвэр, тохиолдол биш. 2020 онд ҮАБЗ-ийн зөвлөмжийн дагуу Асгат, Салхитын мөнгөний ордыг барьцаалж ахмадуудын тэтгэврийн зээлийг төр тэглэж өгсөн. Тухайн үед ч, өнөөдөр ч Салхитын мөнгөний орд эдийн засгийн эргэлтэд ороогүй, "Эрдэнэс Монгол" компани нэг их наяд 141 тэрбум төгрөгийн өрөнд ороод байгаа. Тэтгэврийн зээл тэглэснээс хойш таван жил өнгөрсөн ч өнөөдөр энэ өрийг төлж чадаагүй, Монголбанкы алдагдалд тооцогдож байна. Асгат, Салхитын мөнгөний ордыг эдийн засгийн эргэлтэд оруулах замаар тэтгэврийн зээл тэглэсэн өрийг дарахаар төлөвлөж, бонд босгосон. Гэтэл өнөөдөр ч Асгатын мөнгөний ордыг эдийн засгийн эргэлтэд оруулж эхлээгүй байгаа бол Салхитын мөнгөний ордын өнөөдрийн нөөц бололцоогоор энэ өрийг дарах боломжгүй гэдэг нь тодорхой болсон.
Гэтэл Г.Занданшатарын Засгийн газар дахин эдийн засгийн эргэлтэд ороогүй байгаа ордуудын нэрийг барьж, иргэдэд 1.8 их наяд төгрөг тараах шийдвэрийг гаргав. Эдийн засгийн эргэлтэд ороогүй байгаа ордуудаас хэрхэн яаж, мөнгө босгож бэлэн мөнгө тараах нь өнөөдөр тодорхой болоогүй ч мөнгө тараах шийдвэр нь бол гарсан. Хэрвээ 1.8 их наяд төгрөгийг иргэдэд тараавал инфляцыг өдөөж, төгрөгийн ханшийг сулруулах зэрэг сөрөг нөлөө ихтэй. Үүнийг эдийн засагч мэргэжилтэй манай Ерөнхий сайд мэдэхийн дээдээр мэдэж байгаа.
Иргэд 30 гаруй жил төрөөс бэлэн мөнгө тараах бус ажиллах, амьдрах, бизнес эрхлэх таатай орчныг бүрдүүлж өгөхийг л хүсэж ирсэн. Гэтэл эдийн засагч Ерөнхий сайдтай байгаад ч нэмэргүй бололтой. Бэлэн мөнгө тарааж, эдийн засгаа хорлодог нөгөө хуучны жишиг үргэлжлээстэй. Бүх салбар нь уналтад орчихсон байгаа энэ цаг үед 1.8 их наяд төгрөгийг иргэддээ бэлнээр тарааж байхаар нэг ч гэсэн салбартаа хөрөнгө оруулалт хийж, хөл дээр нь босгож өгөхийг л иргэд хүсэж байна. Өнөөдрийн нэг сая төгрөг маргааш иргэдийн халааснаас хоёр сая болж гарна гэдгийг хүн бүхэн ойлгодог болсон энэ цагт бэлэн мөнгө тараах нь эсрэгээрээ сөрөг пи-ар болно. Учир нь өнгөрсөн 30 гаруй жилийн хугацаанд төр олон удаа бэлэн мөнгө тараасан ч бидний амьдрал, нийгэм улам бүр уруудан доройтсоор байгааг бүгд харж, мэдэрч байна. Тиймээс бэлэн мөнгө тараах шийдвэрээ эргэн харж, нэг ч гэсэн салбараа өөд татаж, үйлдвэрлэгч улс болох бодлого гаргаач Ерөнхий сайд аа.
