УИХ-ын чуулганы баасан гарагийн /2025.12.26/ хуралдаан үргэлжилж байна. Тус хуралдаанаар Оюу толгойн бүлэг ордын ашиглалтын талаарх хянан шалгах Түр хорооны тайлан дүгнэлтийг сонслоо. Улмаар УИХ-ын тогтоолын төслийг хэлэлцлээ.
Ийнхүү чуулганаар Оюу толгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэх хүрээнд хийсэн тусгай шалгалт, нээлттэй сонсголын мөрөөр авч хэрэгжүүлэх арга хэмжээний тухай УИХ-ын тогтоолыг УИХ-ын гишүүдийн 81.2 хувь дэмжиж, батлав.
Тус тогтоолын төсөлд “Онтрэ” ХХК-иас 34 хувь эсвэл АМНАТ авах, зээлийн хүүг бууруулах, монголын өгөөжийг 53 хувьд хүргэх чиглэл багтжээ. УИХ-ын тогтоол батлагдсантай холбоотойгоор УИХ-ын гишүүн О.Батнайрамдалаар ахлуулсан Оюутолгойн бүлэг ордын ашиглалтын талаарх хянан шалгах Түр хороог татан буугдсанд тооцлоо.
Үргэлжлүүлэн УИХ-ын дарга Н.Учрал Зөвшөөрлийн тухай хуульд өөрчлөлт оруулах санаачилгын талаар хэлэлцэж байна. Энэ үеэр гишүүд асуулт асууж үг хэлээ.
УИХ-ын гишүүн Б.Бат-Эрдэнэ: Мэргэжлийн холбоод тодорхой зөвшөөрлийг олгож эхэлсэн. Энд олгож байгаа зөвшөөрлийг хэрхэн хялбаршуулж байгаа вэ. Хоёрдугаарт, зөвшөөрөл олгох хугацааг заавал зааж өгдөг. Энэ нь нягтлах нэрээр маш удаж, өрсөлдөөнд шударга бусаар нөлөөлдөг. Үүнийг хэрхэн шийдвэрлэж байгаа вэ. Гуравдугаарт, иргэдийг маш их төөрөгдүүлдэг. Өмнө нь бүх мэдээллийг цахимжууллаа гээд зөвшөөрлийг цахимаар авахаар зохицуулсан.
