Ерөнхий сайд Г.Занданшатарыг огцруулах бичигт 40 орчим гишүүн гарын үсэг зуржээ. Гэхдээ дандаа УИХ дахь АН-ын гишүүд гарын үсэг зураад байгаа аж. УИХ-ын тухай хуульд зааснаар гишүүдийн дөрөвний нэгээс доошгүй буюу 32 гишүүн гарын үсэг зурвал УИХ-д өргөн барих боломжтой болно. Харин 50+1 буюу 64 гишүүн дэмжсэнээр Ерөнхий сайд огцорно.

Гэхдээ энэ удаад АН-ын дарга О.Цогтгэрэл Засгийн газрыг унагааж чадахгүй гэдэг "бор шувуу" Төрийн ордонд нисэх болж. Хэдийгээр АН-ыхан дээр МАН-ын гомдогсод буюу УИХ-ын дарга асан Д.Амарбаясгалангийн талын 30 гишүүн нэмэгдвэл Засгийн газрыг унагана. Тиймээс О.Цогтгэрэл гишүүнийг гарын үсэг цуглуулж эхэлсний дараа буюу энэ 7 хоногийн эхээр МАН-ын Ерөнхий нарийн бичгийн дарга Я.Содбаатар Төрийн ордноор явж АН-ынхантай уулзалт хийжээ. Харин АН-ынхан Ерөнхий сайдыг огцруулах байр суурь дээрээ бат зогсоно гэдгээ илэрхийлсэн учраас АН-ынхныг бус УИХ-ын дарга асан Д.Амарбаясгалангийн талынхныг "тойглож" эхэлсэн гэнэ. Хэрвээ тэд АН-ынхантай нэгдчихвэл О.Цогтгэрэл гишүүний цуглуулж буй гарын үсэг тоглоом биш болно. Тиймээс МАН-ын дарга нар АН-ынхныг бус нам доторх "сөрөг хүчнээ" тойглож, аргадаж эхэлжээ.

УИХ-ын дарга асан Д.Амарбаясгалангийн талынхны хамгийн том албан тушаалтай байгаа нь УИХ-ын дэд дарга Ж.Бат-Эрдэнэ. Тиймээс дэд дарга Ж.Бат-Эрдэнэ дээр зангидагдаж байгаа гэсэн мэдээлэл бий.

АН-ын дарга О.Цогтгэрэл энэ баасан гарагт юм уу, ирэх 7 хоногийн даваа гарагт Ерөнхий сайд Г.Занданшатарыг огцруулах саналаа УИХ-д өргөн барихаар төлөвлөж байгаа аж. Хэрвээ УИХ-д өргөн барьчихвал 10 хоногийн дотор хэлэлцэх хуулийн хугацаатай. Тиймээс МАН-ын удирдлагууд намын нөхдөө тойглож, уулзалт хийгээд тун завгүй байгаа бололтой.