Ерөнхий сайд Г.Занданшатар өөрийнх нь талд ажилласан юм уу, багийн хүмүүсээ албан тушаалаар шагнаад явчихдгийг өнгөрсөн зургаан сарын хугацаанд хийсэн томилгооноос нь харж болно. Нүүрэндээ авлига, хулгайтай тэмцэнэ гэчихээд хаалганы цааны авлигын гэмт хэрэгт холбогдсон хүмүүсийг албан тушаалд томилж, эс үйлдэхүй гаргах нь хэвийн л үзэгдэл боллоо.

Ерөнхий сайд Г.Занданшатар өчигдөр өөрийн бас нэгэн томилгоог хийв. Сангийн яамны Төрийн нарийн бичгийн даргаар М.Баярмагнайг томилжээ. М.Баярмагнай МАН-д зүтгэж байгаагүй, улс төрийн хүрээнд түүнийг Г.Занданшатарын хүн гэдэг. Ерөнхий сайдтай нэг нутгийнх бөгөөд түүний түлхээсээр төрд чамгүй албан тушаалд томилогдон ажилласан. Энэ удаад ч найзынхаа татаасаар Сангийн яамны Төрийн нарийн бичгийн даргаар томилогдож байгаа бололтой.

М.Баярмагнай 2024 оны УИХ-ын сонгуульд хангайн бүсэд нэр дэвшихээр горилж байсан ч квот олдоогүй. МАН-ынхны хэлдгээр "тооноор орж ирж" албан тушаалд томилогдож, бялуу хүртэгсдийн нэг. Өнгөрсөн хугацаанд яг энэ зарчмаар тэрээр ЗГХЭГ-ын дэд дарга, Эрчим хүчний дэд сайд, "Хөгжлийн банк"-ны ТУЗ-ийн дарга зэрэг албуудыг хашсан. Харин Хөгжлийн банкны ТУЗ-ийн даргаар ажиллаж байх хугацаандаа зээлийн шаардлага хангагүй аж ахуй нэгжид зээл олгосон асуудлаар шалгагдаж байсан. УИХ-ын хянан шалгах Хөгжлийн банкны сонсголд гэрчээр дуудагдсан ч ирээгүй. Уг нь УИХ-ын Хянан шалгах сонсголыг найз Г.Занданшатар нь УИХ-ын дарга байхдаа санаачилж, нэвтрүүлсэн. Тэгвэл тэрээр Хөгжлийн банкны сонголд гэрчээр дуудагдсан ч ирж оролцоогүй юм. Ямартаа ч улстөрд нөлөө бүхий татаастай бол төрийн ямар ч албанд томилогдож болдгийн бас нэг жишээ.

М.Баярмагнай 1972 онд Баянхонгор аймгийн Баянхонгор суманд төрсөн. Эдийн засагч мэргэжилтэй. Бизнесийн магистр зэрэгтэй гэжээ.

Боловсрол:

• 1990 онд Баянхонгор аймгийн Ерөнхий боловсролын дунд сургууль,

• 1998 онд Румын Улсын Бухарест эдийн засгийн академи,

• 2016 онд Австралийн Баруун Сидней их сургууль

Ажилласан байдал:

• 1999-2002 онд Худалдаа хөгжлийн банкны Маркетингийн газарт эдийн засагч, ахлах эдийн засагч,
• 2002-2005 онд мөн банкны Судалгаа маркетингийн газрын захирал,
• 2005-2006 онд Лондонгийн Сэргээн босголт, хөгжлийн банкны Төв Азийн газарт дадлагажигч ажилтан,
• 2006-2008 онд Худалдаа хөгжлийн банкны Жижиг, дунд байгууллагын газрын захирал,
• 2009-2011 онд Хүнс, хөдөө аж ахуй, хөнгөн үйлдвэрийн яамны Жижиг, дунд үйлдвэрлэл хөгжүүлэх сангийн захирал,
• 2011-2012 онд мөн яамны Хөнгөн үйлдвэрийн бодлогын хэрэгжилтийг зохицуулах газрын дарга,
• 2012-2014 онд Баянхонгор аймгийн МАН-ын хорооны дарга,
• 2012-2016 онд “ЮП” ХХК-ийн дэд захирал,
• 2016-2019 онд Эрчим хүчний яамны Төрийн захиргааны удирдлагын газрын дарга,
• 2019 онд Байгаль орчин, аялал жуулчлалын яамны Төрийн захиргаа удирдлагын газрын дарга,
• 2019 оны 6 дугаар сараас Засгийн газрын Хэрэг эрхлэх газрын Гадаад хамтын ажиллагааны албаны дарга, дэд даргын үүргийг хариуцагч,
• 2020 оноос Засгийн газрын Хэрэг эрхлэх газрын дэд даргаар тус тус ажилласан байна.