Шатахууны хомсдолын асуудлаар Аж үйлдвэр эрдэс баялгийн яамны холбогдох албан тушаалтнууд мэдээлэл хийлээ. Тэд он дуустал энгийн АИ-92, Евро-5, АИ-95, дизель түлш дээр үнэ нэмэгдэхгүй. Оны дараа экспортлогч улсууд ямар нөхцөл тавихыг мэдэхгүй гэсэн юм.

АҮЭБ-ийн дэд сайд Б.Энхтүвшин: Бид нефть импортлогч компаниудтай нягт холбоотой ажиллаж байгаа. ОХУ-аас өдөрт 40 вагон АИ92 автобензин улсын хилээр оруулж ирж чадвал өдрийн хэрэгцээг бүрэн дүүрэн хангаад явна. Харин 40-60 вагон орж ирвэл бага зэргээр нөөц үүсгээд, дараа сардаа ШТС-уудад нийлүүлээд явах бүрэн боломжтой.

Шалтаг, шалтгаан хэлбэл олон. Гэхдээ үүссэн нөхцөлийг ард түмэнд зөв ойлгуулах хэрэгтэй байна. Өдөрт 34 вагон ороод ирвэл Монгол Улсын өдрийн хэрэглээнд хомсдол үүсэхгүй. Гэтэл арванхоёрдугаар сард 13 өдөр 34 вагон шатахуун орж ирээгүй. Есөн өдөр л орж иржээ. Тухайлбал, энэ сарын 18-нд нэг, 8-нд 3, 14-нд 13 вагон шатахуун орж ирсэн тул нөөц бүрдүүлж чадахгүй, шууд түгээлтэд гаргаад байгаа. Шатахуун түгээх станцуудад жигд хүргэж чадахгүй байгаа учраас хомсдол үүссэн, дараалал буурахгүй байгаа юм.

Сүүлийн өдрүүдэд ОХУ, Монголын Засгийн газар хоорондын хэлэлцээрийн дагуу нөхцөл байдал, зовлон жаргалаа ярьж байж нийлүүлэлтээ нэмэх хүсэлт өгсөн. ОХУ-ын Ерөнхийлөгч манай улсыг ямар ч тохиолдолд нефтиэр тасралтгүй хангана гэж үргэлж хэлдэг.