Манай улсын шатахуун тасарч, иргэд олон хоног дугаарлаж байгаа. Сүүлийн өдрүүдэд АИ92 шатахууны үнэ 3080 төгрөг болж нэмэгдсэн гэх мэдээлэл олон нийтийн сүлжээнд гарсан. Тэгвэл тус асуудалтай холбогдуулан Аж үйлдвэр, эрдэс баялгийн яамнаас мэдээлэл хийлээ.

Аж үйлдвэр эрдэс баялгийн яамны Газрын тосны бодлогын хэрэгжилтийг зохицуулах газрын дарга Ч.Хишигдалай: Өчигдрөөс эхлэн зарим шатахуун түгээх станцууд үнийн самбараа шинэчилж евро-5 стандартын бүтээгдэхүүн худалдаалж эхэлсэн. Үүний улмаас АИ92 бензин ШТС-ууд дээр харилцан адилгүй үнээр зарагдаж байна. Тухайлбал, “Тэс петролиум” 3080 төгрөгөөр борлуулж байхад “Шунхлай”, “Петровис” компаниуд 2990 төгрөг, “Сан петролиум” 2930 төгрөгөөр худалдаалж байгаа зэрэг үнийн зөрүү байна. Иймээс иргэдийн дунд АИ92 бензиний үнэ нэмэгдсэн үү гэх тодорхой бус ойлголт үүсээд байгаа юм.

Манай улс өнгөрсөн сард 75 мянган тонн шатахуун захиалж хэрэглэсэн бол энэ сард 85 мянган тонн болж өссөн. Нэмэгдсэн хэрэгцээг хангах зорилгоор 25 мянган тонн евро-5 стандартын АИ92 авто бензинийг ОХУ-аас худалдан авч, аж ахуйн нэгжүүд нийлүүлж байна. Евро-5 стандартын бүтээгдэхүүний үнэ нийлүүлэгчээсээ хамааран ялгаатай нийлүүлж байгаа тул дотоодын борлуулалтын үнэд нөлөөлж байна.