Дэд сайдын томилгооноос болж Г.Занданшатарын Засгийн газар дахин огцрох, эсэх дээрээ тулах бололтой. Нийгэм, эдийн засгийн амьдрал өдөр өдрөөр хүндэрч, шатахуун, түлш нь олдохгүй байгаа энэ цаг үед Засгийн газар 16 дэд сайд томилж, иргэдийг бухимдуулахаас гадна сөрөг хүчин нь эсэргүүцэж, огцруулах гарын үсэг цуглуулах шалтгаан болов.

Уг нь аливаа улсын төр судалгаа тооцоотой шийдвэр гаргадаг баймаар. Гэтэл манайд бол улс төрийн хүрээнд дарга нар нь тохиролцсон бол нэг өдөрт ч асуудлыг шийдчихдэг. Дэд сайдын томилгоо яг л энэ жишгээр явсан. Дэд сайд нарын томилгооны асуудал таг чиг, төсөв мөнгийг нь ч ирэх оны төсөвт суулгаагүй хэрнээ нэг өлгөө МАН-ын Удирдах зөвлөл хуралдаж шийдвэр гаргаад өдөр нь Засгийн газрын хуралдаанаар томилчихсон. Гэтэл төсвийн орлого 2.3 их наяд төгрөгөөр тасраад, төр ч, иргэд ч мөнгөгүй байгаа энэ цаг үед даргын тоог 16-аар нэмсэн нь олны бухимдлыг төрүүлээд байна. Өчигдөр иргэдийн төлөөлөл Төрийн ордны зүүн талд жагсаал хийж, УИХ дахь намын бүлгүүдэд шаардлага хүргүүлсэн. Хэрвээ дэд сайд нарын томилгоог цуцлахгүй бол тэмцлийн дараагийн хэлбэрт шилжинэ гэдгээ ч илэрхийлсэн.

Харин энэ бүхний дараа Засгийн газар Ерөнхий чиг үүргийн яамдыг дэд сайдтай нь үлдээж, бусдыг нь цуцлахаар ярьж эхэлжээ. Ерөнхий чиг үүргийн яамд гэдэг нь Эдийн засаг хөгжлийн яам, Гадаад харилцааны яам, Сангийн яам, Хууль зүй, дотоод хэргийн яам багтаж буй. Тэгэхээр томилогдоод 7 ч хоноогүй 16 дэд сайдын дөрвийг үлдээгээд 12-г нь халах хувилбарыг Засгийн газар ярьж эхэлсэн аж.

Гэхдээ Засгийн газар дэд сайдын томилгоог хийхдээ хуульд заасан заалтыг хэрэгжүүлж байна гэж тайлбарласан. Сөрөг хүчин шаардлага тавихад "Та бүхэн хуулиа өөрчилчихвөл дэд сайдгүй ажиллаж болно" гэх тайлбарыг хийсэн.