Сүүлийн үед ОХУ-ын РУСАЛ компанитай холбоотой шүүхийн шийдвэр олны анхаарлыг татаж байна. Уг хэрэг нь дэлхийн уул уурхайн аварга Рио Тинто компанийн эсрэг гаргасан нөхөн төлбөрийн нэхэмжлэл төдий бус, харин стратегийн ач холбогдолтой хөрөнгө, геополитикийн нөлөө, Оюу толгойн ордын бүс нутгийн ач холбогдлыг хөндсөн асуудал болж хувирлаа.
Калининград мужийн Арбитрын шүүх РУСАЛ компанийн Рио Тинтогийн эсрэг гаргасан нэхэмжлэлийг хангаж, ойролцоогоор 1.3 тэрбум ам.долларын хохирлыг барагдуулах шийдвэр гаргасан байна. Шүүхийн шийдвэр нь энэ сарын 11-нд гарч, 15-нд албан ёсоор баталгаажээ. Анхаарууштай зүйл нь Монгол Улсад үйл ажиллагаа явуулдаг Оюу толгойг гуравдагч этгээдээр оролцуулж, Нидерланд дахь толгой компанийг хариуцагчаар нэрлэсэн явдал юм.
Эл хэргийн шүүх хурал явагдсан тул шийдвэрийн үндэслэл олон нийтэд ил болоогүй ч, РУСАЛ энэ шийдвэрийг ашиглан Рио Тинтогийн хөрөнгөтэй улс орнуудад нөхөн төлбөр нэхэмжлэх хууль эрх зүйн сууриа бүрдүүлэхийг зорьж байгаа нь тодорхой байна.
Рио Тинто давж заалдах шатанд гомдол гаргах нь бараг тодорхой юм. Бас нэгэн анхаарлыг татаж буй нэг зүйл бол шүүх хурлын цаг хугацааны давхцал юм. Калининград дахь шүүх хурал энэ сарын 8–10-ны хооронд болсон бол, Монголд Оюу толгойн асуудлаар сонсгол 8, 10, 12-нд явагдсан нь санамсаргүй давхцал биш байж болзошгүй. Эдгээр үйл явдал хоорондоо харилцан нөлөөлөх боломжтой байсан гэж зарим ажиглагч үзэж байна.
