УИХ дахь АН-ын бүлэг ээлжит бусаар хуралдаж, Засгийн газарт төрийн данхар бүтцээ цомхотгож, дэд сайд нарын томилгоогоо цуцлах шаардлагыг хүргүүлж байгаа талаараа мэдээлэл хийлээ. Уг шаардлагыг нь намрын чуулганд багтаан шийдэхгүй бол Засгийн газрыг огцруулах асуудлыг тавина гэдгээ мэдэгдэв.
АН-ын бүлгийн дарга, УИХ-ын гишүүн О.Цогтгэрэл: Манай бүлэг ээлжит бусаар хуралдаад Засгийн газарт шаардлага хүргүүлэхээр боллоо. Гол асуудал нь Монгол Улсын Засгийн газраас дэд сайд нарыг томилж байгаа асуудал, нөгөө талаас төрийн үрэлгэн бүтцээ хэзээ хэрхэн бууруулах юм бэ. Татвар төлөгч аж ахуйн нэгжүүд хүнд байдалд орлоо, эхнээсээ дампуурлаа зарлаж байна. Татвар хураах төрийн хүчирхийллийн тухай яриад байдаг. Нөгөө талд нь татвар төлж байгаа аж ахуйн нэгжүүдийн нөхцөл хүнд байна. Ийм хүнд нөхцөлд байхад, мөн Төрийн хэмнэлтийн тухай хууль хүчин төгөлдөр үйлчилж байхад Монгол Улсын Засгийн газраас дэд сайд нарыг нэмж томилж, нийт 40 сайдтай болж хувирч байна. Үүнийгээ тайлбарлахдаа бүтээмж болон хяналтын менежерийг цомхотгосон гэж худлаа ярьж байна. Энэ бүгдийг бүгдийг нь цомхотгох ёстой. Хуульд заасан 8-9 хувийн цомхотголоо ч хийх ёстой. Тиймээс АН-ын бүлэг ээлжит бусаар хуралдаж, Засгийн газарт дараах шаардлага хүргэхээр боллоо.
Монгол Улсын Засгийн газар эдийн засгийн тодорхой бодлогогүй, улс төрийн системийн авлигад бүрэн идэгдэж, ялзарсны уршгаар эдийн засаг зогсонги байдалд орж, эдийн засаг агшиж эхэлж байна. Аж ахуйн нэгжүүд татварын өртэй, дансаа хаалгаж, боловсрол, эрүүл мэндийн салбар элгээрээ хэвтэж, иргэдийн амьжиргаа доройтож, эмзэг хэсэг нь хүнсний хомсдолд орох аюул нүүрлэж байна. 2025 оны орлого тасарч, төлөвлөсөн хөрөнгө оруулалт хугацаандаа хийгдэхгүй аж ахуйн нэгжүүд гүйцэтгэлийн төлбөрөө авч чадахгүйгээс болж ирэх оны төсөв өртэй эхлэх нөхцөл бүрдэж байна. Нэн даруй татварын дарамтыг бууруулж, эдийн засгийн өсөлтийг тэтгэх, төрийн данхар бүтцийг цомхотгох, Засгийн газар хэмнэлтийн горимд ажиллах онцгой шаардлага үүслээ.
Ерөнхий сайд Г.Занданшатарын Засгийн газар эдийн засгийн нөхцөл байдалд бодит үнэлэлт өгөх чадамжгүй, эдийн засгийн өсөлтийн суурь болох аж ахуйн нэгжүүдийн өмнө тулгамдсан асуудлыг шийдвэрлэх хүсэлгүй, иргэдийн амьжиргааг сайжруулах асуудлыг үл тоож байна.
20 сайдтай өнөөгийн төрийн данхар бүтцийг бууруулахын оронд 16 дэд сайд нэмж томилох, шинээр агентлаг байгуулах харалган шийдвэр гаргаж байна. Үүгээрээ өмнөх Засгийн газрын алдаа завхралыг засаж, эдийн засгийн өсөлтийг дэмжиж авлигатай тэмцэж ажиллана гэж найдсан олон нийтийн итгэлийг ч хөсөрдүүлж байна.
Тиймээс УИХ дахь АН-ын бүлэг Ерөнхий сайд Г.Занданшатарын өнөөдрийн буюу 2025.12.17-нд гаргасан дэд сайд томилох шийдвэрээ буцааж, Засгийн газрын өнөөгийн данхар бүтцээ цомхотгох санал боловсруулж намрын чуулганд багтаан УИХ-д оруулж ирэхийг шаардаж байна. Энэхүү шаардлагыг биелүүлэхгүй бол УИХ дахь АН-ын бүлгээс Засгийн газрыг огцруулах асуудлыг тавина гэдэгт гишүүд санал нэгдэж байна гэжээ.
Өнөөдрийн байдлаар 70 мянга гаруй аж ахуйн нэгж татварын өртэй байгаагаас 20 мянга гаруй ААНБ-ын дансыг татвараас хаасан гэсэн мэдээлэл байна. Засгийн газар, Монголбанкнаас Монгол Улсын гадаад валютын нөөц 6 тэрбум ам.долларт хүрсэн гэж мэдэгдэж байгаа ч манай улсын урсгал тэнцэл 1 тэрбум ам.долларын алдагдалтай, эдийн засаг хүндэрч байна гэж АН-ын бүлгээс мэдээлэв.
