УИХ-ын нэгдсэн чуулганы хуралдаанаар  Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийн эцсийн хэлэлцүүлгийг хийлээ. Тус хуулиар шатахуун импортлогч компаниудад түлш хадгалах сав барих хөнгөлөлттэй зээл олгох юм. Өнгөрсөн хугацаанд манай улс шатахууны нөөцийн савгүй байсан гэдгийг салбарын сайд Г.Дамдинням хэлсэн. Тус хуулийг баталбал 2030 оны арванхоёрдугаар сарын 31 хүртэл хэрэгжүүлэх юм байна.

Хэлэлцэж байгаа асуудалтай холбогдуулан гишүүд асуулт асууж хариулт авлаа. Харин санал хураалтыг маргааш өглөө хийхээр болов.

УИХ-ын гишүүн О.Цогтгэрэл: Шатахууныг ОХУ-аас хэдээр авах, авчраад хэдээр зарахыг Засгийн газар тогтоож өгдөг. Юун чөлөөт зах зээл. Яг социализмаараа. Социализм бол дандаа хомсдол гардаг тогтолцоо. Үүнийг дагаад хар зах, хуурамч бүтээгдэхүүний схем уламжлалаараа явж байна. Төр стандартаа тавиад чөлөөт өрсөлдөөнийг бий болгохоор өөрөө эрүүлжээд явчихна. Таны өгч байгаа зээлийг аж ахуйн нэгжүүд аваад сав барих юм уу. Бодлогын хүүн дээр нэмэх нь 2.5 нийт 18 хүүтэй зээл аваад сав барих уу. Үүний оронд зах зээлийг нь чөлөөлөөд өгч болохгүй юм уу. Роснефтьттэй Засгийн газар хатуу гэрээ хийдэг. Энэ буруу зүгт яваад байгаа юм биш үү.