УИХ-ын Нотлох баримтыг шинжлэн судлах сонсгол энэ 7 хоногт болж байгаа. Тус сонсголд 300 гаруй хүнийг гэрчээр дуудсан. Өчигдрийн сонсголд УИХ-ын гишүүн асан Б.Батбаяр гэрчээр оролцож, үг хэллээ. Тэрээр Английн компанитай хамтарсан компани байгуулсан ч ашиг авах нь бүү хэл өвчтэй байх хугацаанд нь компанийг нь төр засаг удирдаж байсан нэр бүхий хүмүүс хамтран эзэмшигчтэй нь нийлж 100 хувь өөрийн өмч болгон авсан талаараа мэдээлэл өгсөн юм. Энэ ажилд Л.Оюун-Эрдэнийн Засгийн газрын хууль зүйн сайд оролцож, хийсэн гэдгийг хэлсэн юм.
Тэрээр "2014 онд хамтарсан үйлдвэр байгуулах гэрээ хийгээд 50:50 хувийг эзэмшсэн. Би энэ компаниас нэг төгрөгийн ч ашиг аваагүй. Харин энэ компани жилд 40 сая ам.доллар олдог. Би нэг ам.доллар ч аваагүй, ногдол ашиг аваагүй. Гадаадын том хөрөнгө оруулагч юм байна гээд би маш хүлээцтэй хандсан. Дараа нь би маш хүндээр өвчилсөн. Дөрвөн жил гадаадад эмчлүүлсэн. Энэ хугацаанд тэд миний 50 хувийг улстөрчидтэй хуйвалдаад цөмийг нь авчихсан. Компанийг маань өөрсдийн нэр дээр 100 хувь гэж Улсын бүртгэлд бүртгүүлсэн. Энэ компанийг байгуулахад би 5 сая ам.долларын хөрөнгө оруулсан. Өнөөдөр нэг ч төгрөг байхгүй. Яг Оюу толгойтой адилхан. Үүнийг Л.Оюун-Эрдэнийн Засгийн газрын Хууль зүйн сайд нэг нөхөр хийсэн. Бөөн популизм хийгээд, хамтрал хомун байгуулна гээд л. Тэр хүн энийг хийсэн. Өөрөө тэр компанийн зөвлөх нь" гэсэн.
Тэгвэл Л.Оюун-Эрдэнэ 2019 оноос хойш зургаан жил орчим Ерөнхий сайдаар ажилласан. Энэ хугацаанд түүний Засгийн газрын Хууль зүйн сайдаар одоогийн Хотын дарга Х.Нямбаатар, одоогийн Хууль зүйн сайд Б.Энхбаяр, УИХ-ын гишүүн О.Алтангэрэл нар ажиллаж байсан юм.
