Сангийн сайд асан С.Баярцогт сайд “Рио Тинто”-той Арбитрын маргаантай байгаа Оросын компани нөхөн төлбөртөө Оюу толгой төслийн хувийг авахыг хүссэн гэсэн мэдээлэл өгсөн. Тэгвэл энэ талаар Оюу толгой ХХК-ийн гүйцэтгэх захирал С.Мөнхсүхээс тодрууллаа.

Тэрээр "Австралид байдаг хөнгөн цагааны үйлдвэрийн эзэмшилтэй холбоотой маргаан явж байгааг та бүхэн мэдэж байгаа байх. Энэ үйлдвэрийн 20 хувийг ОХУ-ын "Русал" компани, 80 хувийг нь Рио Тинтой эзэмшдэг байсан. Украины дайны нөхцөл байдалтай холбоотойгоор санкц тавигдсан байгаа. Бүтээгдэхүүн хувааж авах гэрээтэй байсан. Тэр гэрээгээ биелүүлэх боломжгүй гэснээс үүдэн маргаан үүссэн. Тэр маргаан нь Австралийн шүүхээр яваад дээд шүүх нь гэрээгээ биелүүлээд явах ёстой гэсэн Рио Тинтогийн байр суурийг дэмжсэн. Үүнийг ОХУ-ын "Русал" компани эсэргүүцэж ОХУ-ын иргэний шүүх дээр маргаан гаргаад явж байгаа. Энэ нь дан ганц "Русал", Рио Тинтогийн маргаан биш Оюу толгойг татаж оруулж ирэх дүр зураг харагдаж байна" гэсэн юм.