Сүүлийн дөрвөн жилд томуугийн улирал дунджаар 39 долоо хоногоос дээш үргэлжилж, жилд нийт 764 мянган хүн өвчилсөн байна. Амьсгалын замын халдварт өвчний улмаас 77,420 хүн эмнэлэгт хэвтэж, амьсгалын замын цочмог халдвараар 66 хүн амь насаа алджээ. Түүнчлэн 0–5 насны хүүхдүүдийн өвчлөл нь амьсгалын замын цочмог хүнд халдварын 40–70 хувийг, нас баралтын 27.7 хувийг эзэлж байгаа нь хамгийн эмзэг бүлэг хэвээр байгааг харуулж байна.
Жил бүр хүн амын дунд томуугийн H3N2, H1N1, В хүрээний вирус болон амьсгалын замын синцитиаль вирус голлон тархдаг. Энэ хүрээнд томуу, томуу төст өвчний нийт өвчний 81 хувийг бага насны хүүхдүүд, харин хүндрэлийн дийлэнхийг 50-иас дээш насны ахмадууд эзэлдэг байна. Дэгдэлтийн оргил үе арванхоёрдугаар сарын дунд үед тохиолддог ч энэ жил амьсгалын замын синцитиаль вирус болон A(H3N2) вирус давамгайлсан тул өвчлөл илүү эрт эхэлж, хурдтай тархаж, хүндрэх эрсдэл нэмэгдсэн байна. Гэхдээ өчлөлийн дэгдэлт нийслэл хотод буурч байгааг Эрүүл мэдийн сайд Ж.Чинбүрэн хэллээ.
Тэрээр "Одоогийн дэгдэлтийн үндсэн шалтгаан нь А хүрээний вирусийн идэвхжил гэв. Тэрээр “Өвчлөл өндөр хэвээр байгаа ч 2025 оны арванхоёрдугаар сарын 3-ны өдрийн байдлаар амбулаторийн болон яаралтай тусламжийн тасгуудаар үйлчлүүлэх иргэдийн тоо буурах хандлагатай. Харин эмнэлэгт хэвтэн эмчлүүлж буй хүүхдийн тоо нэмэгдсэн.
Нийслэлд өвчлөл буурч байгаа нь хэд хэдэн хүчин зүйлтэй холбоотой. Үүнд сурагчдыг богино хугацаанд цахим сургалтад шилжүүлж, иргэдийн амны хаалт хэрэглэх идэвх нэмэгдэж, 5 хүртэлх насны хүүхдийг гэрийн хяналтад эмчлэх зохицуулалт нэвтэрч, урьдчилан сэргийлэх сургалт, сурталчилгаа эрчимжсэн зэрэг юм.
Мөн томуугийн үзлэгийг лавлагаа шатлалын эрүүл мэндийн байгууллагуудад хийдэг журмыг шинэчлэн баталж, энэ долоо хоногоос хэрэгжүүлж эхлэхээр болсон. Ингэснээр үзлэгийн дараалал буурч, хэвтэн эмчлүүлэх шаардлагатай тохиолдол цөөрөхөөс гадна өвчтөн хооронд халдвар дамжих эрсдлийг багасгах ач холбогдолтой" гэлээ.
Томуу, томуу төст өвчний үүсгэгчийн бүтэц:
Мэргэжлийн байгууллагын тооцоогоор өвчлөл арванхоёрдугаар сарын 15-нд оргилдоо хүрэх төлөвтэй байгааг хэлсэн. Иймд Эрүүл мэндийн яамнаас иргэдийг маскаа тогтмол зүүхийг уриалсан юм.
Ханиад, томууны үед дархлаагаа дэмжих зөвлөмж
Өрөө тасалгааг байнга агааржуулах
Ажлын болон амралтын ачааллыг зөв тохируулах
Хамраа давсны уусмалаар угаах
С амин дэмээр баялаг жимс, ногоо хэрэглэх хэрэгтэй.
