Монгол Улсын Тэргүүн шадар сайд бөгөөд Эдийн засаг, хөгжлийн сайд Ж.Энхбаяр ОХУ-ын Эрхүү хотод ажиллаж, Монгол-Оросын бүс нутгуудын анхдугаар чуулга уулзалтад оролцож байгаа аж.

Тус чуулга уулзалтын үеэр ОХУ, Монгол Улсын Засгийн газар хооронд ирэх таван жил буюу 2026-2030 онд хамтын ажиллагааг хөгжүүлэх хөтөлбөрт гарын үсэг зурсныг Оросын хэвлэлүүд мэдээлжээ.

Чуулга уулзалтаар нийт 11 салбар, чиглэлийн 72 төсөл, арга хэмжээг багтаасан “Монгол Улс, ОХУ-ын бүс нутаг хоорондын хамтын ажиллагааг хөгжүүлэх 2026-2030 оны дунд хугацааны хөтөлбөр”-ийг баталсныг Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр, ОХУ-ын Засгийн газрын орлогч дарга А.Л.Оверчук нар зарласан байна. 

Энэхүү хөтөлбөрт хоёр улсын худалдаа, эдийн засаг, соёлын төсөл хөтөлбөрүүдийг хөгжүүлэх зорилтууд багтсан бөгөөд Оросын бүс нутгууд болон Монголын аймгуудын хооронд 120 гаруй хамтарсан арга хэмжээ зохион байгуулахаар тусгажээ.

Тэргүүн шадар сайд бөгөөд Эдийн засаг, хөгжлийн сайд Ж.Энхбаяр “Монгол, Орос хоёр улсын худалдааны тэнцлийн зөрүүг бууруулж, харилцан ашигтай хамтын ажиллагааг хөгжүүлэх талаар хоёр тал идэвхтэй ажиллаж, Монгол Улс Евразийн эдийн засгийн холбоо, түүний гишүүн орнуудтай худалдааны түр хэлэлцээрийг байгуулсан. Энэхүү хэлэлцээр нь зөвхөн тарифын зохицуулалт бус, бизнесийн байгууллагуудын хамтын ажиллагааг өргөжүүлэх, хил гаалийн түвшний хүндрэлүүдийг бууруулах, хөрөнгө оруулалтын урсгалыг нэмэгдүүлэх бодит хэрэгцээг хангаж байна. Үүний үр дүнд аж ахуйн нэгжүүдийн үйл ажиллагааны зардал буурч, хөрөнгө оруулагчдын итгэл нэмэгдэхээс гадна иргэдэд хүрэх бүтээгдэхүүн, үйлчилгээний үнэ буурч, хүртээмж сайжрах нөхцөл бүрэлдэнэ. Хоёр тал худалдааны түр хэлэлцээрийг үр ашигтай хэрэгжүүлэх хүрээнд мэргэжлийн байгууллагуудын хамтын ажиллагааг хангаж, нягт хамтран ажиллаж байна. Дээрх санаачилгуудтай уялдуулан Монгол Улсын Засгийн газар эдийн засгийн төрөлжилтийг нэмэгдүүлэх, макро эдийн засгийн тогтвортой байдлыг бэхжүүлэх бодлогын хүрээнд реформын цогц арга хэмжээг авч хэрэгжүүлж байна. Үүнд хувийн хэвшлийн оролцоог өргөжүүлэх, жижиг, дунд болон гарааны бизнесийг дэмжих, хөрөнгө оруулалтын эрх зүйн орчныг шинэчлэх бодлогыг шат дараатайгаар хэрэгжүүлж, бизнесийн орчныг бүх түвшинд сайжруулахад чиглэх юм. Өнөөдрийн хэлэлцүүлэг, уулзалтууд нь бизнес эрхлэгчид болон бүс нутгийн удирдлагуудад шинэ түншлэл тогтоох, харилцан ашигтай хамтарсан төслүүдийг эхлүүлэх өргөн боломж олгож буйгаараа онцлог юм. Үүний зэрэгцээ эдийн засаг, шинжлэх ухаан, техник, технологи, аялал жуулчлал зэрэг салбарын мэдээлэл солилцоо, харилцаа холбоо илүү идэвхжиж, хамтын ажиллагааг цаашид гүнзгийрүүлэхэд чиглэнэ. Эдгээр санаачилгыг бодит зорилт, тодорхой үйл ажиллагаатай уялдуулан үр дүнд хүргэхэд өнөөдөр батлагдаж буй 11 салбар, чиглэлийн 72 төсөл, арга хэмжээг багтаасан “Монгол Улс, ОХУ-ын бүс нутаг хоорондын хамтын ажиллагааг хөгжүүлэх 2026-2030 оны дунд хугацааны хөтөлбөр” стратегийн хамтын ажиллагааг дараагийн шатанд аваачих чухал алхам болж буйг онцлох нь зүйтэй.