МИАТ компанийн гүйцэтгэх захирал Б.Мөнхтамир хэвлэлд мэдээлэл өгчээ. МИАТ компанийн алдагдал 9.6 тэрбум төгрөгт хүрсэн учраас гүйцэтгэх захиралтай хариуцлага тооцох чиглэлийг өнгөрсөн 7 хоногийн Засгийн газрын хуралдаанд Ерөнхий сайд Г.Занданшатар чиглэл болгосон юм. Тэгвэл МИАТ компанийн гүйцэтгэх захирал Б.Мөнхтамир ажлаас чөлөөлөгдөх хүсэлтээ сарын өмнө ТУЗ-даа өгсөн гэлээ.

Тэрээр “2025 оны дөрөвдүгээр сард уул уурхайн бус компаниудыг нэгтгэж Эрчис Монгол компани байгуулсан. МИАТ компанийн хувьцаа эзэмшигчийн эрх 100 хувь Эрчис Монгол компани руу шилжсэнтэй холбоотойгоор манай компанийн үндсэн үйл ажиллагаанд дүгнэлт хийгээд зөвлөмж гаргасан. Энэ дүгнэлт нь 2025 оны есдүгээр сар хүртэлх МИАТ компанийн гуравдугаар улирлын тайлангийн асуудал яригдаж байгаа. Ийм асуудал яригдах нь зөв. Асуудал байгаа. Энэ жилийн хувьд компанийн санхүүд төвөгтэй асуудлууд бий, үүнийг би үгүйсгэхгүй.

Өнгөрсөн жил бид ОХУ-аас шатахуунаа 800 орчим ам.доллароор авч байсан бол энэ жил 1300 ам.доллароор авч байгаа. Үүнтэй холбоотойгоор зардлууд өссөн. Орон тоо нэмсэн асуудал ярьж байна лээ. 2021 оноос хойш МИАТ компани 5 онгоцтой үйл ажиллагаа явуулж байсан бол өнөөдөр 10 онгоцтой үйл ажиллагаа явуулж байна. Орон тоо батлагдсанаас айхтар хэтрээгүй. Үүн дээр хариуцлага тооцох асуудал яригдсан. Хариуцлага тооцох нь ТУЗ-ийн бүрэн эрх. ТУЗ тайлбар аваад хариуцлагын асуудал яригдах байх.

Үүнээс үл шалтгаалаад сүүлийн сар гаруйн хугацаанд би өөрийн хүсэлтээр ажлаас чөлөөлөгдөх хүсэлтээ тавиад байгаа. Би бодлогын түвшинд өөр ажил эрхлэх учраас ажлаа өгөх хүсэлтээ өгсөн. Би МИАТ компанийн гүйцэтгэх захирлаар дөрвөн жил гаруй ажиллалаа. Аж ахуйн ажлаас хөндийрч бодлогын түвшинд ажиллах үүднээс хүсэлтээ өгч байгаа. Сүүлийн хоёр хоногийн хугацаанд МИАТ компанийн захирлыг шахаад ажлыг нь авах гээд байна гэсэн зүйл ярьж байна. Тийм зүйл огт байхгүй. С.Бямбацогт сайд бид хоёр хамтарч ажиллаж, МИАТ компанийн өөрчлөлтийг хамтраад хийсэн. МИАТ компани жилд 2500 орчим нислэг хийдэг байсан бол 4500 орчим нислэг хийдэг болсон байна. 500 тэрбум төгрөгийн орлого олдог байсан бол их наяд төгрөг болон нэмэгдсэн. МИАТ компани агаарын тээврийн зах зээлийн 50 хувийг эзэлж байгаа.