Нийслэлийн иргэдийн төлөөлөгчдийн хурлын ээлжит бус VIII хуралдаан өнөөдөр болж, энэ үеэр Хотын дарга Х.Нямбаатар нийслэлийн агаарын чанарт гарсан өөрчлөлтийн талаар мэдээлэл танилцууллаа. Нийслэлийн агаарын чанар өмнөх оны мөн үетэй харьцуулахад хүхэрлэг хий, PM2.5, PM10 буурсан үзүүлэлттэй байгаа ч азотын давхар исэл өссөн байна. Энэ нь хар тугалганы агууламж өндөр АИ-92 бензиний хэрэглээнээс үүдэлтэй аж.

Тэрээр “2025–2026 оны галлагааны улиралд бид анх удаа Улаанбаатар хотын 170 мянга гаруй айл өрхийг импортын хагас коксон түлшээр хангах зорилт тавьж ажиллалаа. Энэ бол богино хугацаанд хэрэгжүүлсэн том зорилт юм.

Одоогоос дөрөв хоногийн өмнөөс эхлэн Улаанбаатар хотын 400 гаруй нүүрсний цэгүүд 100 хувь хагас коксон түлшээр хангагдаж эхэлсэн. Үүнээс өмнө нийт нийлүүлэлт 50 хувь нь мидлинг болон сайжруулсан түлш, үлдсэн 50 хувь нь хагас кокс байсан. Одоогоор айл өрхүүд дунджаар хоёр долоо хоног орчмын мидлинг, сайжруулсан түлшний нөөцтэй байгаа. Энэ нөөц дууссанаар, өөрөөр хэлбэл хоёр долоо хоногийн дараагаас Улаанбаатарын ердийн зуухтай бүх айл өрхүүд бүрэн хагас коксон түлш рүү шилжинэ.

Бид эхний өдрүүдэд 50:50 харьцааг барьсан. Ингэж ажилласан шалтгаан нь импортын нүүрсний нөөцийг бүрдүүлэхэд Эрээний өргөн төмөр зам дээр ачаалал үүссэнтэй холбоотой. Тиймээс нөөцөө бүрдүүлж, зардлаа бууруулах үүднээс Энержи Ресурс компаниас мидлингийг дараа төлбөрийн нөхцөлтэй авч, Улаанбаатар руу тээвэрлээд ямар ч барьцалдуулагчгүйгээр угаасан мидлингийг худалдаанд гаргасан.