Эрүүл мэндийн яамнаас томуугийн дэгдэлттэй холбоотойгоор Боловсролын яамд бага ангийн сурагчдын өвлийн амралтыг хоёр долоо хоногоор урагшлуулах албан саналаа хүргүүлээд байгаа билээ. Тэгвэл Боловсролын сайд П.Наранбаяр дараах байр суурийг илэрхийллээ.

Боловсролын сайд П.Наранбаяр: Томуугийн дэгдэлт хуулийн хүрээнд гамшгийн хэмжээнд хүрээгүй байгаа. Мэргэжлийн байгууллага нь Нийслэл алаг цог дэгдэлтийн хүрээнд байна гэж мэдээлсэн. Түүнчлэн, таван аймагт идэвхжилийн, зарим газарт улирал хоорондын маягийн тархалт, дэгдэлт байна гэж хэлээд байгаа. Үүнд нь таарсан цахимд шилжүүлэх ажил явагдана. Карантин, хичээл хаах, амралтыг урагшлуулах гэсэн асуудал байхгүй. Ковидын үед боловсролын хоцрогдол ноцтой хэмжээнд хүрсэн. Дэлхийд хамгийн урт хугацаанд сургуулиа хаасан улсуудын нэг. Тэгэхээр бид ханиад, томуугийн улирлаа тооцож улирлын бүтцийг хийсэн. Та бүхэн анзаарсан бол өнгөрсөн жил энэ бүтцийнхээ дагуу хичээллээд ямар нэгэн цахим шилжилт хийлгүйгээр танхимдаа хичээллүүлж дуусгасан. Сүүлийн 10 гаруй жил ийм тохиолдол байгаагүй, үргэлж л янз бүрийн шийдвэр өөрчлөгддөг байсан. Энэ хүрээнд бид хэсэгчилсэн байдлаар шийдвэрлэх ёстой гэж харж байна.

Хоёрдугаарт, улирлынхаа бүтцийг өөрчлөхгүй. Учир нь бага анги арванхоёрдугаар сарын 15-ны өдрөөс нэгдүгээр сарын 26 хүртэл 41 хоног маш урт хугацаанд амарч байгаа. Идэр есийн хүйтнийг давах, агаарын бохирдол туйлдаа хүрдэг үеийг тооцсон. Мөн арванхоёрдугаар сарын 15 гэдэг ханиад, томуугийн тархалтын хамгийн өндөр идэвхжилтэй үе байдаг. Ийм тооцооллыг хийсэн байгаа үед хичээлийг 14 хоног наашлуулж амраа гэдэг бол хэцүү. Хэсэгчилсэн байдлаар зарим анги, газар нутгийг цахимд шилжүүлнэ. Эрүүл мэндийн яамнаас авсан мэдээллээр 0-15 насныхан нийт өвчлөлийн 80 хувийг эзэлж байна. Гэтэл 0-5 насны хүүхдүүдийн 98 хувьд нь вакцин хийсэн гэсэн. Энэ бол ковид биш томуу. Өөрөөр хэлбэл, зөвхөн нийслэлийн төвийн дүүргүүдийн дэгдэлттэй байгаа газруудын 1-9 дүгээр ангийн хүүхдүүдийн хичээлийг цахим руу шилжүүлнэ. Үүнийг ирэх долоо хоногоос гаргахаар судалж байна. Бусад газар хичээллэдгээрээ хичээллэнэ.